今日姜濤23歲生日，銅鑼灣又變成「姜濤灣」，幾乎由朝到晚都有大批「姜糖」喺SOGO、金百利外打卡、派生日應援；當電車「姜濤號」駛經時，喺軒尼詩道兩旁聚集嘅人群又一齊叫「姜濤生日快樂」，場面墟冚。所以警方亦都一早到場戒備，不斷以廣播提醒市民唔好違反限聚令。
壽星仔姜濤亦都拍片多謝姜糖們嘅心意，片段喺姜濤香港後援會ig上載，佢喺片中首先多謝大家一直以嚟對佢生日嘅應援，尤其今次見到大家用心準備佢嘅23歲生日，亦提到自己生日願望好簡單，「我諗同好多人一樣，希望疫情快啲過，希望每個人快啲回復返正常生活。疫情期間，希望大家都充滿愛，可以互相幫助，一齊度過呢段艱難時候，咁我哋可以快啲去旅行，所以再次希望所有人身體健康，支持我嘅fans姜糖們永遠幸福。」
