夏蕙姨要離開香港了！佢今早喺facebook宣佈，「懷着好唔捨得嘅心情！我要同大家講一句，8月我要走啦！我唔知幾時可以再喺香港同大家見面！我唔知大家會唔會掛住我！」佢無透露會去邊，只係話「無論身處世界某一個角落，我都會好掛住大家！」
夏蕙姨又話，唔經唔覺已經同經理人小肥豬Simon，一齊努力咗十年，「佢見證住我人生最低潮嗰一刻，亦在我最低潮同黑暗嘅年代，幫我重新包裝形象，由D&G事件開始，叫我關心社會事情，教我用搞笑嘅手法，與民同樂。呢段時間，雖然艱辛，不過真係好開心！」佢後日（12日）將會同經理人最後一次訪問錄影，「我會好懷念呢一刻！直到永遠。」而帖文最後，佢都再次多謝大家，話「有緣再會！」
【新聞有價 記者有格 立即訂閱：https://bit.ly/3wGQh7c】
提起夏蕙姨，好多人都會諗起佢過往大年初一去黃大仙祠上頭炷香嘅獨特造型，曾經喺現場同佢搶頭炷香嘅「東方昇」知道消息後，都喺facebook話「好想喊，好想再同夏蕙BB一齊搶多一次頭炷香…又一個香港嘅寶貝將會移民離開香港，好好保重，生活愉快，記住多啲返嚟香港。」
除咗上頭炷香，夏蕙姨亦曾參與社會運動，除咗佢提到嘅D&G事件，2019年反修例運動期間，佢亦曾參與「香港之路」人鏈，更出po表示希望親身了解年輕人想法，但亦因為咁而遭朋友割席。此外，社民連前主席吳文遠亦都po咗2014年佔中時，同夏蕙姨嘅合照，仲提到「當年BB堅瞓街」，吳文遠亦都好唔捨得佢走，但都祝福「夏蕙BB，一路順風，保重身體呀，繼續活出真我，有話直說，他日再在街上重聚。」
