周殷廷喜歡戶外騷　落台與粉絲握手自拍勁親民

周殷廷（YT）以壓軸嘉賓身份出席音樂活動，獻唱期間走到台下與粉絲握手又自拍，非常親民。而同場的女團Lolly Talk唱組合Twins的歌曲，但不表演側手翻。

【新聞有價 記者有格 立即訂閱：https://bit.ly/3wGQh7c】

周殷廷、陳凱詠（JACE）及女團Lolly Talk昨晚為《The Singleton Just Sing Live in Wonderland》擔任嘉賓。

Lolly Talk 以短裙獻唱歌曲，現場粉絲即時血脈沸騰興奮歡呼拍掌，眾成員都好識做，獻唱多首經典女團歌：「我哋好鍾意Twins，《明愛暗戀補習社》係佢哋第一首歌，可以翻唱佢哋啲歌係驚喜！（練佢哋側手翻？）我哋有同排舞師講過，但要時間練吓先，依家唔敢獻醜住，平時我哋唱K都會唱女團啲歌，今次舞台上演出係好開心！」

陳凱詠出場時，即席在台上飲酒助興：「其實我咩情況都會飲酒，因為養聲最主要係識保護聲帶、飲多啲水，但係開心反而緊要啲。我見啲外國歌手成日會唱兩句、飲兩啖，一直都好想試吓，所以頭先試咗啦，聽到台下大叫飲杯！」JACE笑指聽到大家問何時開個唱，但現推出新歌為主，仲話想儲快歌成為「獨立跳唱」歌手。

周殷廷壓軸出場，佢就話好鍾意戶外騷，所以唱到第2首歌已行落台握手，粉絲不斷瘋狂尖叫，他又十分體貼親民，仲來者不拒跟粉絲自拍！雖然Fans要求「除衫」，但YT則拒絕，但仍坐在台前超近距離唱歌，氹到粉絲好開心。