周國賢（Endy）今晚舉行第二場《THE END》演唱會，出道18年他昨晚終於踏上紅館舞台，和歌迷一同分享其多年來音樂路，其間他與Zarahn三位舊戰友一齊在紅館台上演出，Endy說：「除咗係自己第一次，亦係Zarahn嘅第一次。」
【新聞有價 記者有格 立即訂閱：https://bit.ly/3wGQh7c】
四子唱出《如果感覺有顏色》、《猛鬼街》。Endy的Rock仔造型更乘機騷身段邊彈結他邊騷腹肌，最後唱到《十四天》時，Endy更High到跪地兼瞓地。Endy請來樂隊ToNick做嘉賓，合唱完《時空》後，主音恆仔上前給Endy一個兄弟抱抱，沒料到竟被Endy嘴了一啖，令恆仔來不及反應，全場尖叫不停。
演唱會上，Endy亦有分享自己情緒上有時不懂分對與錯，就像小時候將顏料塗上手去畫畫，同學都覺得他不對，當時老師反而沒怪責他，還叫同學跟他用手代筆畫畫，Endy謂：「喺我自己都區分唔到好與壞嘅年代，我自己都學習中，好多人為咗點教下一代要做一個好人，但對於我嚟講，要做一個好人之前，首先要學識點做一個人，我每日都學緊。」
台上Endy出動多支私伙結他伴奏，還有騷琴技自彈自唱《逃生門》，他在演唱會上亦多度哽咽，當唱《天使》一曲前，說到18歲時寫這首歌，當時不懂得站在那一個人的角度去看事情，現在才懂得，邊說邊感觸哽咽眼濕濕。到尾聲時，Endy說在開騷前一星期，有一位共事七年，就像他姐姐的司機同事離世，他哽咽說：「我喺呢個地方（紅館）一而再，再而三擦身而過，冇咗一次又一次機會，直到今日終於可以喺呢度，但佢行早咗…行早咗少少，我記得早幾個月前知道呢個消息可以嚟紅館，佢話『我終於可以車你上紅館喇！』佢做到啦，多謝家姐，我哋會再見，this is not the end!」之後《身後身》，場面感人。
