古天樂宣傳賀歲片時透露，曾為王丹妮中一句對白想到廢寢忘餐，結果看到人物訪問的一句 Never get stuck (不要鑽牛角尖)，決定借這句說話鼓勵香港人遇到困境時隨遇而安
古天樂、王丹妮（Louise）與張文傑（German）接受HOYTV訪問，提到新片《臨時決鬥》有多場和王丹妮對打的戲份，古仔笑言自己有憐香惜玉：「我一直以為佢高過我，原來唔係囉！因為對打嘅時候全部都赤腳，所以見真章，我梗係有錫住佢啦！不過佢唔覺咋嘛！」Louise及German亦認同古天樂有所遷就，German表示和古天樂對打不難，最難是對戲：「因為嗰場我哋對罵嘅情節，對峙嘅時候真係好近，幾乎可以親吻對方! 爭啲忍唔住錫咗落去，所以好緊張！哈哈哈！」
說到最難忘的劇情，古仔就自爆為王丹妮的一句對白廢寢忘餐：「我記得我為咗幫佢度一句好精警嘅對白，諗咗成晚都諗唔到，之後無端端睇咗一個人物訪問，佢講嗰句 Never get stuck (不要鑽牛角尖)，我覺得幾好喎！因為中文好難用一兩句去講到呢個意思，我又唔想同佢對一場戲為咗呢樣嘢，所以呢句係好好，人唔應該stuck咗喺度，一定要向前行啦！ Move on啦！但係最好睇嘅係咩呢？ 佢行過我身邊講呢句說話嘅時候，要懶型咁喎！咁我咪話懶型做咩啫！咁嗰個氣氛拍出嚟係好好嘅。」
幾年前由幕後轉到幕前的German亦坦言，自己都曾經鑽牛角尖：「頭頭轉去幕前嘅時候，嗰幾年真係好艱難，完全冇人識自己，又冇人搵你做嘢，都好掙扎下，究竟係咪繼續行呢個行業呢？但最後都係自己走出困局，堅持咗咁多年，其實知道自己真係好想繼續做囉！」Louise明言經常處於鑽牛角尖嘅狀況，但無論怎樣都好，日子總得要過，回頭再望，其實沒有什麼大不了。古天樂亦認同每個人都會面對過困境，會鑽牛角尖：「只能夠講句，如果自己冇辦法就出嚟嘅時候，就要隨遇而安，唔好逼得自己太緊，幫到自己嘅只有自己一個，放鬆下先囉！」
近年為香港電影業付出很多的古天樂亦承認，未來電影業還要面對很多難關：「經濟又唔好，咁我覺得未來電影業一定要一個好大嘅轉變，第一樣嘢就要知道市場嘅定位，第二就係要了解觀眾需要啲乜嘢，呢兩三年對於業界同埋觀眾都係一個整合期，大家都要磨合一下，我只能講大家做一啲創新啲嘅嘢啦！向新嘅方向出發，唔好再Stuck喺度。」
