距離冇得剪頭髮嘅兩星期，只係剩返2個鐘鬆啲。呢一刻嘅你，係咪等緊焗油呢？
MIRROR嘅Stanley（邱士縉）就喺佢嘅IG Story話，「頭髮長，又無得剪，人生真艱難」。呢個冇Set頭，而頭髮長到遮眼嘅Stanley都係咁有型，唔知兩個星期後佢會唔會變成九龍灣泰山呢？
獨立股評人胡孟青（青姐）今午（9日）同拍檔冼潤棠開live《4點痴線財經》時，竟然身處髮型屋，一路set頭一路主持節目，補緊髮色嘅青姐就話：「今日唔剪要等兩個禮拜呀大佬，我啲頭髮長得太快，如果頭髮唔多點做到代言人啫？係咪？」
唔知大家有幾耐冇見過長頭髮嘅何韻詩呢？佢啱啱出道時，留過到肩嘅頭髮，而佢就Post咗唱《櫻桃小丸子》主題曲年代時嘅舊照，話︰「無嘅，剪唔到頭髮咋嘛，使死咩……最多咪留番呢個頭。我係話我個頭，唔係我隻手指住嗰個頭，唔好誤會。」
DJ少爺占都話︰「最多咪留長頭髮，寡人一早就留過啦，唔會驚你嘅！各位一齊捱世界嘅市民，袋住呢句︰關關難過關關過﹗」仲同一直幫佢剪頭髮嘅髮型師同埋髮型屋打氣～
