ERROR同MIRROR做普通話訪問都不忘保留香港特色，MIRROR就有隊長擔當港普代表，而ERROR更加係全隊上陣。早幾日ERROR就喺MakerVille開幕禮被問到近日問得最多嘅問題：「有冇MIRROR飛？」，保錡一句金句竟然令佢衝出國際！
有記者問到多唔多人問ERROR有冇MIRROR飛，呢個時候保錡就話「姣多，眉聽都姣多忍呀」，「禾叉依頂頂，耳圍自己打錯工呀，禾耳圍自己是my妃的，禾左聽，有依個痕Knee High的，他給禾依個呢，喂志，他括弧禾姐哥喂志，梳禾要姐哥位置，可Bu可以幫禾買喎，禾當堂嚇一跳，然後得啖笑，禾爭D以為自己真的是my飛的。然後，禾醒一醒，原來禾bu是，我是MakerVille的地底泥，bu是my飛的」。
唔好意思，畀返正常中文版本：「好多，每天都好多人呀」，「我差一點點以為自己打錯工，我以為自己是賣飛，昨天有個很厲害，給我一個位置，說要呢個位置，可不可以幫我買，我當堂嚇一跳，然後得啖笑，我真的以為自己是賣飛的。然後，我醒一醒，原來我不是，我是MakerVille的地底泥，不是賣飛的」。
點知呢句「我以為自己是賣飛的」引起德國駐香港總領事館German Consulate General Hong Kong嘅Facebook小編關注，成為專頁「每週一字」嘅德語教學題材，而「我以為自己是賣飛的」德文就是「Ich dachte, ich sei ein Ticketverkaufer」。
見到自己衝出國際，Poki就留言︰「每日一篇」，Fans仲恭喜佢「進軍」德國，又多謝小編「多謝關心宇宙天團Error😘」，仲有人問「地底泥德文又點講？」。
Channel絲期待有一日ERROR唔單止成為港普代表，仲可以發明埋港德語，成為真．宇宙天團！
