第五波疫情嚴峻，除咗C AllStar成員On仔（陳健安）確診外，組合ONE PROMISE成員 Anton及天衡亦證實初步確診，暫時各自喺屋企隔離。佢哋喺ig感謝各方好友慰問，「大家唔使太擔心我哋」，答謝所有前線醫護人員「辛苦晒，多謝你哋嘅付出！加油！」亦勉勵大家「記得保重身體，多喝水，多吃生果，多做運動，多聽音樂。撐住，一定會過的。」
On仔、Anton及天衡上周五（11日）曾客串MIRROR成員AK（江熚生）同Alton（王智德）嘅合唱歌MV，琴日（16日）就傳出現場有兩名工作人員確診。據報道，當日歌手連工作人員有過百人，MIRROR嘅Lokman同Frankie、麗英、洪嘉豪等都有客串演出，而麗英及Alton都已喺ig報平安，提大家保重身體。
MIRROR經理人花姐回覆傳媒查詢時表示，已安排MIRROR、ERROR成員呢兩日檢測；洪嘉豪所屬嘅華納唱片公司亦表示，「知悉事件後已安排去進行檢測。」
