如果要揀最唔鍾意嘅卡通人物，大家會揀邊個？有網民近日就喺連登以「有冇人好憎Melody」開post， 話My Melody係八婆、雙面人，成日扮可愛講「唔該你呀」，又大數佢喺卡通片入面嘅罪狀，好似佢就試過為Kuromi貼完膠布又搣返出嚟，真係睇片都覺得痛。所以網民都話佢係扮好心幫Kuromi，但每次都好心做壞事，形容「Melody做過嘅衰嘢多到喺筆記簿度寫到有幾千件事」。
帖文引來唔少網民熱議，連官方fb專頁「Sanrio Gift Gate Hong Kong」都有出post回應，話留意到近日網上有不少有關My Melody的批評，表示「極度遺憾及強烈抗議」。fb小編仲話每次幫完My Melody 換水、搬嘢均有講「唔該你呀」，認為佢「十分有禮貌」。
事件都引來九巴仔抽水。九巴今晚fb專頁出post，見到九巴仔扮My Melody話「唔該你呀，車長😚～辛苦晒你哋🥺！喺疫情下都緊守崗位，梗係要好好多謝佢哋💋！」九巴又趁機呼籲乘客乖乖合作，唔好留低垃圾、唔好大聲講電話等。
YouTuber頻道「小薯茄」都拍咗條「【八婆】有種朋友叫My Melody」短片，片中阿冰同麗英分別扮Melody同Kuromi，演出Melody嘅八婆惡行。
