由Sunny Idea主辦，R Flat、KKLIVE、特高娛樂及Chill Life協辦，Mentholatum Lipcare冠名贊助《RubberBand <Juntos> 音樂會》，平安夜晚（24日）起假九龍灣國際展貿中心Star Hall舉行。第二場演出中，一直坐在Drum Set王座的泥鯭特別應樂迷要求，走出T台與大家互動，而樂迷的熱情，亦令RubberBand在完場後來個「真Encore」，令人喜出望外。
【新聞有價 記者有格 立即訂閱：https://bit.ly/3wGQh7c】
樂迷在聖誕夜與RubberBand一同度過，令6號非常感動，除感謝大家到來，他又表示：「我哋第一次征服T型舞台，見到阿正、阿偉同Jason Kui都有走出嚟俾大家見下，但好似爭緊個，大家係咪好想見下呢位金頭佬呢？」染了一頭金白頭髮的泥鯭此時走到T台，6號問他在後面悶不悶，泥鯭即說：「唔悶，仲睇到好多嘢。今日第二場，琴日完場之後，聽到有啲歌迷講，叫我出嚟多啲，成日得你哋3個，但係我走出嚟，你哋幫我打呀？但今日大家爭取到喇！」話雖如此，泥鯭說了數句後，6號便要他回去繼續打鼓，但泥鯭道：「我要唱歌呀！大家繼續爭取呀！」
現場樂迷的熱烈喝求，終令泥鯭在尾聲時拿起結他，與隊友一起來個Acoustic演出。當泥鯭走到T台盡頭與6號會合時，6號突然跪低，為泥鯭摺褲腳，原來泥鯭為方便打鼓，將一邊褲腳捲起，6號見狀即細心為隊友整理服裝，場面十分窩心。泥鯭此時分享心聲道：「其實坐喺後面係好悶，而家成功爭取到啲兄弟俾我出嚟唱歌，但其實都係6號唱，不過我哋都有個傳統，喺做《呢度》音樂會嘅時候，我哋有個細台，同大家好近，我哋都好鍾意呢種感覺，希望今日聖誕夜將呢個感覺帶返俾大家。」RubberBand然後隨即唱出〈Easy〉一曲，全場也跟著一起拍和，氣氛和諧又有愛。
在唱過新專輯同名歌曲〈Juntos〉後，音樂會本來就結束，但樂迷熱情Encore，一直未肯離去，結果令RubberBand再次走到舞台上，6號感動地道：「太熱情喇大家！琴（前）晚呢隻歌大家冇乜反應，陣間睇下你哋又會係乜嘢反應，就估計到你哋幾時開始喜愛我哋喇！」然後RubberBand便唱出〈遊車河〉一曲，全場跟著拍和大合唱，台上台下打成一片，唱罷阿正、泥鯭及Jason Kui更興奮得向台下拋出毛巾，音樂會亦在氣氛高漲的一刻作結。
