MIRROR演唱會今朝10點又有網上優先訂飛，今次輪到Mox Bank。但無論鏡粉、前夫們做咗幾多準備，出動6、7、8、9、10個手提裝置，兩個幾鐘入面都只係見到「請重試」呢個畫面無限輪迴。就連Mox Bank App未夠10點都已入唔到，只彈出通知話「由於演唱會優先訂票反應熱烈，以致Mox app網絡出現問題，令你暫時未能登入。」
直到點幾，鏡粉、前夫們終於入到網站，但已顯示「售罄」。對於再一次經歷撲唔到飛，有前夫就繼續喺fb群組「我老婆嫁左比Mirror導致婚姻破裂關注組」圍爐訴苦，開po話「一人post 張相証明比前妻我已經盡力修補婚姻關係…成也mirror，敗也mirror…」，結果引來唔少人留言，有人就po相見開咗10個browser都無個入到，問「開100個又如何？」
Mox Bank一個鐘前都有喺fb專頁出po，話由於好多人登入Mox app，令app網絡速度緩慢，提大家揀SMS收密碼，不過就反而引嚟大量鏡粉、前夫，甚至本身想用Mox服務嘅用戶留言洩憤，「賣晒嘅話直接寫賣晒仲好啦，要幾萬人喺度等」、「為咗演唱會飛 正常用戶都用唔到 😂 叫人點放心放啲錢喺你銀行」、「我剩係想開 APP 急住過數畀人，點解搞到正常銀行服務都用唔到」。
