今日又係一個好重要日子，就係MIRROR官方歌迷會正式成立喇！鏡粉可以喺官網登記成為「MIRO」，一年會籍費用為$440，可享有四大專屬福利，除咗得到迎新禮盒外，亦有訂購MIRROR演唱會、粉絲見面會門票機會，同埋網上訂購MIRRO商品機會，不過官方都講明到時都要視乎供應而定嘅，而且部份fans活動都設年齡限制～
MIRROR社交平台公佈消息後，唔少鏡粉都話秒速入會，但海外鏡粉就可能要搵人代收的迎新禮盒喇，因為表格只限香港地區寄送，所以佢哋都留言跪求開放畀海外鏡粉，唔知官方聽唔聽到佢哋訴求呢？
等咗3周年12子嘅12子官方歌迷會終於誕生，MakerVille行政總裁魯庭暉下午都喺ig出po公佈消息，但就話「要戴定個頭盔先」，同事為歌迷會都研究咗好耐，「背後嘅所有嘢，太多太多細節。太多太多嘢我哋左諗右諗，太多嘢要平衡。『如果咁咁咁就好啦』...好喇，但如果咁咁咁，又會導致另外一啲問題出現。因為呢個project同搞其他project好唔同。因為係粉絲，因為佢哋係MIRROR嘅一部份。呢件事，有血有肉。」
魯生又話「有好多超唔完美嘅地方」，每個部門同事都好擔心，但佢哋會盡力一步一步改善進步：「因為如果想嘗試做一啲我哋未做過嘅嘢，係會戰戰兢兢，有時候，面對呢啲未知，手裏面拎住一個實在嘅嘢，同自己講，呢part ok...再嚟第二part...再嚟第三part...心，會定。信念，會穩。所以，頭盔位，做得未夠好多多見諒。另外，喂個welcome pack 好似真係幾靚咁。」
