MIRROR將於7月尾舉行10場紅館演唱會《MIRROR.WE.ARE LIVE CONCERT 2022》，鏡粉同前夫早前經歷兩輪「優先運吉」嘅搶飛慘痛經歷後，唔知會唔會對官方歌迷會嘅訂購MIRROR演唱會門票機會有一絲期望，不過歌迷會今日就話畀大家知，呢個機會仲難過中六合彩。
MIRROR今日喺社交平台發帖公佈︰「為咗令MIRO更容易入場支持MIRROR，Fan Club已經預留限量門票並將舉行抽籤認購活動。每位MIRO都可以參與，中籤者將可於指定日子購買演唱會門票2張，到時一齊為MIRROR尖叫。」不過，10場演唱會預留畀官方歌迷會嘅中籤名額夾埋只有2,500名，um......這些機會～～～
結果帖文一出，留言都幾乎一面倒鬧爆，「2,500真係想講粗口」、「仲難過中六合彩」、「2500個名額會唔會太少呢？fan club 都唔只5萬人，仲未計知道消息後入會嘅炒家，真心覺得好攰」、「成日叫唔好買黃牛！黃牛見到真粉得2500張應該好開心囉！真粉究竟點先會有運可以支持到偶像？作為現今最多fans既artist. 係咪應該為fans 諗多啲？ 定之後又要搶演唱會DVD呀？」、「引人入會，最後都係得2500張，當鏡粉係乜？」
有唔少鏡粉都希望MIRROR歌迷會可以參考其他歌迷會，預留門票畀fans，或者設專屬場畀MIRO，「如果係真心對fans好嘅話，根本應該預留一至兩場俾fan club優先買，會員又可行實名，咁就減少炒賣。」
