MIRROR 4位成員楊樂文（Lokman）、江𤒹生（AK）、王智德（Alton）及陳瑞輝（Frankie）組成的「夜粥小組」，近日推出跳唱作品《FING!》。跳舞多年的4子更首度挑戰在香港甚少見的電子舞曲（electro dance），原來全因Lokman想玩新花臣。
4人的新歌《FING!》的歌曲風格亦是MIRROR前所未有的全新嘗試，AK指歌名時希望大家揈走一些不必要的負能量，又或者鳱關自己事但又擺在自己身上的事：「譬如有啲人放負純粹抒發一下，但自己又會吸咗，所以一啲唔關自己事嘅嘢，揈開晒先，focus返喺自己度，做好自己嘅嘢。」AK續謂：「我哋都講求揈嘅時候要keep返最真實嘅自己，維持最鍾意做嘅嘢，仲要keep返自己最有型嘅狀態。」
Lokman指今次新歌的舞步除了hip hop及wrecking外，亦會嘗試electro dance，原來全因他想玩新花臣！他說：「細個睇過一種舞叫electro dance，睇完好深刻，到我哋有小組歌嘅時候，突然醒起呢個舞種，於是問過三位兄弟都OK，然後問咗一個喺西班牙好多年嘅跳舞朋友，因為呢個舞種都係歐洲發起，佢有學過少少，然後咁啱佢又返香港，就順利成章搵佢幫我哋排舞。」
4子都未曾學過電子舞曲，Frankie坦言很開心可以一齊作出新嘗試，他說：「呢次舞蹈好玩，學到新舞步，我哋4個好似好耐冇跳過舞，終於學到新嘢好開心，大家拍MV前都不停喺度練。」雖然要在拍攝前苦練，但Frankie直言好玩多過辛苦：「《FING!》係3隻小組歌入面跳得最多嘅一首，但拍MV又唔覺辛苦，因為大家好有默契，一齊跳開，vibe好舒服。」
