鏡粉們準備撲飛喇！MIRROR今日宣佈，將於7月25日至31日、8月2日至4日首次喺紅館舉行10場《MIRROR.WE.ARE LIVE CONCERT 2022》四面台騷！票價有$1280、$880、$480，MOX及citibank信用卡可優先訂飛，不過有關詳情及公開發售詳情將會稍後公佈。
疫情下觀眾座位有限制，成功撲到飛機會難上加難，被問到會唔會加場，隊長Lokman就話要經過好多部門，如果門票售罄後而大家想睇，加場都係一件好事。
除咗鏡粉們準備搶飛，前夫們都似乎要做足準備，「我老婆嫁咗比Mirror導致婚姻破裂關注組」版主喺記招完咗都出post，話「要嚟嘅始終要嚟，各位兄弟唔好自亂陣腳，最多一齊瞓街啫！」版主最後都提大家要團結，唔好買黃牛，唔好俾人呃！
