古巨基今年推出音樂企劃「I Really Love To Sing」，與樂壇9位新勢力歌手合作，舊歌新唱他的作品，繼頭炮與呂爵安（Edan）合唱《飄流教室》後，事隔兩個月，基仔與MC張天賦「巨賦」合體；合唱基仔15年前的歌曲《自我安慰》。
【新聞有價 記者有格 立即訂閱：https://bit.ly/3wGQh7c】
由於疫情反覆，最初基仔是透過短訊和視像通話跟MC討論相關合作，直到「實體」見面已經是大半年後的事，基仔表示：「我哋正式聯絡係舊年，而家大家見到MV出現嘅時候已經有大半年，因為疫情所以過咗咁耐先可以郁番去錄音同拍MV，我原本真係好想快啲可以進行，不過唔緊要啦，好嘢唔怕遲。」
提到獲基仔邀請，MC難掩興奮，「我係超！級！開心！收到你message，……，你諗吓有一日你瞓醒，『喂，我係古巨基呀……』嗰吓係好突然，用言語解釋唔到，但係真係好surprise，同埋知道可以一齊錄歌、去合作一首歌，嘩！好有型！」
基仔直言對MC印象深刻，「每一個時代嘅樂壇都需要一啲好有實力嘅唱將，做一啲可以繼續流傳落去嘅歌。我聽到MC唱歌嘅時候，覺得佢嘅能力係呢個樂壇、呢個時代，其中一位非常有實力嘅唱將，所以邀請佢一齊參與呢個Project。」基仔又指，曾在自己社交平台收集網民意見，邀請哪些歌手合作，有不少網民「提名」MC，更說MC入行前唱過基仔的歌曲。
基仔尋找一輪後，找到幾段片後，其中最深刻嘅一段是MC在餐廳表演，「我覺得喺餐廳個音響、環境各樣可能唔算係最『靚仔』嘅情況下，但佢都可以唱出咁『靚仔』嘅聲，我真係好深刻。」而MC坦言自小便喜歡模仿基仔唱歌，甚至假音也是從基仔中學習練成，「我練到假音真係因為聽你啲歌㗎！好似《歡樂今宵》、《第二最愛》，我係聽你嘅歌練到個假音番嚟。」
至於MV女主角再次找來Natalie擔任，基仔表示覺得Natalie演戲不錯，問MC有何感受，MC則謂二人第一見面已經是於大澳拍攝那天，他表示很擔心需要花很多時候讓Natalie適應、warm up，但最後卻來個反高潮，「喺大澳見到佢，佢第一句就：『Yo！What's up！』就過嚟擊掌先喎！反而輪到我驚自己需要warm up啦，其實好快好順利地就熟落咗。」
