女團Lolly Talk為定向挑戰活動拍攝宣傳片，曾美欣指自己與劉綺婷是團隊中的「人肉導航」，但當到工廠區工作，8女便會變成路痴，經常會行錯路。
Lolly Talk為定向挑戰活動擔任星級大使，將於3月2日現身啟動禮。雖然Lolly Talk未曾以團隊形式體驗定向活動，但黃詠霖（阿蛋）小時候參與過不少野外定向，坦言可以四圍跑，好好玩又好開心：「好記得有次我哋係夜晚嘅森林進行野外定向，我嗰陣好細個，又怕黑又怕蟲，森林好黑，得支電筒仔先睇到少少路。我就要喺樹嗰啲位搵標記，我一掂落棵樹，個觸感咁奇怪，郁郁吓嘅？原來係兩隻手指咁粗嘅蟲，我勁驚，大叫，最後要其他隊友幫我完成。」阿蛋笑言由細嚇到大，現時已經不再害怕。
至於誰是「路痴王」？曾美欣（Mei Mei）認為自己與劉綺婷（Yanny）透露最認得路：「另外6個妹豬點解唔係咁認得路呢？我諗因為平時我哋做嘢、去旅行，都係我同Yanny做人肉導航。但係如果我哋去工廠區開工，就會8個都變晒路痴，因為啲路同門口太似啦，搞到我哋成日都行錯路。」
Lolly Talk去年推出首張專輯，她們今年的目標是繼續造更多音樂及不同的內容，陳紀澄（Tania）表示成軍3年，想與不同的人合作，展現更成熟、更有魅力的女團給大家看。去年曾多次到台灣拍節目或出席活動的她們表稱，希望今年有機會到韓國。鄭芷淇（Elka）直言最好可以拍旅遊節目，然後影住我們勁食韓國嘢、瘋狂買買買。
提到早前有唱片公司舉辦女團招募，問到Lolly Talk計劃如何應戰？郭曉妍（Ahyo）認為是好事：「我覺得好有火，因為代表喺女團呢條路上面，有越來越多嘅同行者陪我們一起拼搏、一起努力。仲有一大班女仔去參加招募，為佢嘅夢想去團結、去奮鬥，其實整件事都好有能量，希望我哋有越來越多唔同嘅的可能性，大家一齊玩！」
