「宇宙天團」ERROR今年一直未有出單曲，至昨晚終於推出新歌《枱底隧道》，是何秉舜及黃偉文繼《愛情值日生》及《Never Come Back》後再次為ERROR創作的作品，歌曲唱出四子一貫與別不同的愛情觀，MV更找來一位重量級女主角演出，就是久未有幕前演出的孫佳君參與拍攝，連ERROR都始料不及能邀來性感女神一齊合作。
【新聞有價 記者有格 立即訂閱：https://bit.ly/3wGQh7c】
《枱底隧道》歌詞構思全由Wyman發辦，肥仔解釋：「你都知ERROR嘅愛情觀係幾Error啦！我們一向都會宣揚愛情，但會係點樣嘅愛情觀，就大家自己去諗了。」當中的愛情世界，可以用一場戲的劇情說出來，肥仔道：「一班人食飯，枱面大家傾偈，但枱底啲腳就互相撩緊對方，這首歌講一些好奇怪的關係，大家明明互相相識，但不知如何你會有一些鮮為人知的秘密，對方知道時候，就會顯露出奇怪的曖昧眼神。」
要有愛情戲份，自然要有好的對手，今次MV導演麥啟光曾執導《流氓師表》，更找來近年鮮有在幕前演出的孫佳君擔任女主角，ERROR四子在拍攝前一晚才知道對方會參與。
Poki說：「第一次聽到孫佳君有份參與，梗係呆咗，因為一向有睇開佢啲戲，佢真係好靚，是那個年代的美人，到這個年代睇都係好靚，那種靚不是筆墨可以形容到。」他大讚孫佳君好靚，肥仔卻踢爆道：「我哋以前成日睇孫小姐的作品，但Poki最厲害，不停講孫小姐嘅作品，但全部錯晒，人哋冇嗰啲全部都噏晒出嚟，嗰個Moment笑到暈低。」Poki也搞笑說：「我成日都以為佢同劉嘉玲係同一個人，都有少少尷尬，不過咁樣氣氛反而快融洽，而且可以同前輩熟絡，還交換IG同電話有傾有講。可以同不同前輩學習好開心！可以幫到自己在這個行業走落去。」Poki更是四人中第一個向孫佳君「抄牌」的人，「一定係第一個抄佢牌，因為真係好靚，就係咁簡單。」
首次參與MV演出的孫佳君，今次不單演戲，還有高難度性感Chair Dance，肥仔知道後都大吃一驚。「孫小姐跳之前都唔知會有一Part性感舞步，佢跳緊時，我們在化妝間休息，都知道時已太遲。早講嘛！如果唔係一早衝埋去睇啦大佬，導演自肥又唔講聲。」今次為ERROR破格演出的孫佳君，對於舞蹈演出有備而戰，她說：「今次拍攝前只同排舞老師跳了個半鐘。本來他說拍攝時會來，但那日突然來不到，我都好驚跳得唔好，今次跳Chair Dance，排舞時張櫈不是現場那張，比排舞時的櫈大些，所以更難，幸而疫情期間有跟Sunny Wong學跳舞。所以都過得去。我未睇MV，希望大家唔好笑我跳得唔好！」
對於同ERROR四子合作，孫佳君表示：「同佢哋合作，感覺年輕咗，佢哋好可愛，好有Energy又不停講笑，好得意呀。其實我一直都好想參與MV演出，多謝導演邀請，能夠同四個咁勤力又可愛嘅年青人合作，好Lucky，亦係好難忘嘅體驗。」
