《全民造星IV》今晚將播出第二回合最後一輪淘汰賽，即40強就會誕生。節目預告透露，今晚A、B兩組自選項目會以非主流表演出戰，仲見到評判少爺占討論淘汰參賽者時，拎住咗B組名單，唔知係咁啱，定係B組真係輸咗。至於噚晚（25日）出場嘅A2組同B4組，佢哋嘅演出就令評判非常難抉擇喇！
噚晚平均年齡最細嘅A2組，由Day、Mei mei、Elka、Tania、阿蛋同阿Yo組成，自選項目係跳唱《Candy Ball》，大sell青春可愛，結果獲評判好評，連怕睇可愛嘢嘅韋羅莎都話睇得好舒服。
佢哋對戰嘅B4組有Ivy So、Gao、Sarah、Karen、咖喱同暐翹，呢組就用咖喱之前做醫生嘅一段經歷，化為戲劇《六條金魚》，喺後台嘅節目監製花姐都大讚「好睇」，導師梁祖堯同女團經理人Wing亦睇到喊，一班評判亦被打動，陳輝陽大讚：「我睇完好驚嘆，因為佢畀咗好多情緒畀我，佢直情好似睇?一套mini movie，我係無諗過睇到一個咁嘅表演，尤其係呢嗰節目裏面。」
輪到Dance Battle，兩隊大跳MIRROR嘅《BOSS》，「舞」得難分難解，令到5位評判都非常頭病，其中韋羅莎投票前更忍唔住眼濕濕：「剩係其他4個（評判）投得唔得啊？我唔投得唔得啊？」最終B4組以4盞紅燈晉級。唯一投A2組嘅鍾舒漫就指：「我唔想浪費呢一組，我逐嗰搵，有冇一個係比較離咗神、冇咁投入或者遜色啲，但我搵唔到，所以我呢一分就係畀藍組。」落敗嘅A2組入面，評判最後淘汰咗Elka。
