《全民造星IV》首輪分組對決後，A、B兩組噚晚（29日）分別要淘汰6位同9位參賽者，結果A組嘅Jade Chan、Vicky、何佩、Tania、Mei Mei同阿Yo被淘汰；B組被foul嘅就包括燒賣、鐵鐵、Miko、Carina、蘇菲、Sarah、莎莎、Jolin同Ling。
原本A2組幾乎全軍覆沒，得返被外界視為「女版姜濤」嘅Day，有網民就認為「一隊令觀眾讚嘆的《Candy ball》，評判淘汰咗一個，導師又在佢哋當中淘多三個，就知個節目係咩品味，『輸左就要負返責任』這理由真係搞笑。」另有人覺得「燒賣就係想證明畀屋企人知，宜家連機會都唔畀人」；有網民都話要還我何佩、Sarah同莎莎，「梁祖堯foul咗成隊女團咁滯，妖，激到想棄劇，莎莎做錯咗啲咩？」
其實A組導師許廷鏗（Alfred）宣佈foul「女版Ian」何佩一刻，其他參賽者都O晒嘴。何佩今早就喺Ig po千字文，提到當時心情：「講真，我好唔捨得離開呢個比賽，我冇畀自己任何退路，只想盡力做好；表演前夕，我崩潰爆喊了，唔係對自己嘅表現冇信心，而係努力嘅人，又點止我一個。你哋見到我被叫名嗰一刻，咁冷靜，因為攰，因為一早已經喊完。當我知道係導師做選擇嘅時候，我已經冇諗太多，始終比賽到最後 都係要Foul人，Foul邊個都覺得可惜。」
何佩亦感激兩位導師，明白佢哋要做「劊子手」都唔容易，「壓力比我哋更加大，留邊個走邊個，內心更煎熬。......的確唱歌上Alfred提醒過我好多次，喺同一個位置上冇改善，縱然我中間花好多時間去練習，但表現冇做到就冇做到，而係咁艱難嘅決定下，點都要揀人走，我接受，我明白，亦了解背後嘅用意，我會做好呢份功課。雖然有啲老土，但你真係我第一個導師。一日導師，一世導師，呢樣係唔會變。」何佩又多謝女團經理人Wing﹑節目監製花姐，一眾製作組人員同主持強尼。
40強誕生後，第3回合同樣係A、B組展開5輪對決。率先對戰嘅係A2組對B1組，A2組有阿蛋、Candy、Ashi同Kinki。佢哋表演話劇「我好得閒」，用活潑唱跳方式表演話劇，雖然被評判彈唱功一般，但唔少網民都覺得有新鮮感，仲大讚Candy同Kinki有進步。至於B1組嘅自選項目「有聚‧有別」都係話劇，3位跳得嘅成員Hannah、方方同馬欣先以跳舞「甩step」嚟嚇大家，然後帶出故事，不過評判嘅評語只係好壞參半，連網民都覺得劇情老土。
兩組今晚會繼續對戰，究竟會係A組已被列入「死亡名單」嘅阿蛋，定係B組嘅Hannah會被foul，相信今晚嗰集就會揭曉。
