《全民造星IV》噚晚（11月30日）一集播出A2組同B1組指定項目對決，要演出林二汶嘅歌曲《無忘花》。B1組就再以戲劇形式延續上集自選項目，但評判繼續一面倒批評，方方仲因為表現失誤，連累隊友Hannah淘汰出局。
兩組今次指定歌曲《無忘花》，連A組導師許廷鏗（Alfred）同「外援」鄧小巧都話有難度，好考唱歌功架，但A2組成員阿蛋、Kinki、Candy同Ashi都唔係好唱得，小巧甚至覺得佢哋唱歌實力不如其他組，需要勤練習培養默契。Kinki仲因為壓力大搞到胃抽筋，比賽之前要去睇醫生。
不過到正式比賽，四位嘅演出就令小巧同評判陳健安感動到眼濕濕，安仔大讚佢哋好pure；吳雨霏（Kary）就話feel到佢哋係真情流露；陳詠燊（Sunny）雖然認為不過不失，但好誠懇，Alfred就形容係「超額完成」。
輪到B1組嘅方方、馬欣同Hannah就將歌曲融入上集嘅自選項目「有聚‧有別」，方方同馬欣化上老妝，扮已經跳唔到舞嘅婆婆，Hannah就坐住輪椅。但佢哋嘅演出就得唔到評判欣賞，Sunny就話方方扮演老婦，但唱歌時就變返平日嘅自己，事後方方即刻認錯，「對唔住，其實係我嘅失誤」，仲眼濕濕咁話唱歌時應以老婦聲，但自己冇做到。
評判卓韻芝都話佢哋呢個表演「幫唔到你哋，呢個表演係好多層次，一開口就完全聽唔到好複雜情感。」Kary就認為唱歌都要入戲，但「你哋聽起來好似未開聲」。最後，5位評判一致投A2組勝出，被列入「死亡名單」嘅阿蛋有得留低，Hannah則被淘汰。
之後就到A5組同B3組對決，A5組有被列入「死亡名單」嘅Ika、Day、超酸、 穎蕎同芯駖。佢哋自選項目係《Lady Legend》，年紀最細嘅Day今次一改可愛少女形象，着上高踭鞋跳唱，換上性感Look，連Channel絲都心心眼，加上佢哋表演出色，評判都大讚佢哋已經可以組成女團出道。
