唔知大家噚晚有無睇到《全民造星IV》第六集呢？如果無就要快啲趁9點半前睇啦，因為呢集有矚目嘅仙氣選手殘酷對決呀！
今集第一場Battle係由亞姐冠軍Caca @jesslty213 對上被讚「似」朱茵嘅Alice @huii_alice ，Caca喺台上大唱自己改編周國賢嘅《有時》、《漢城沉沒了》Medley，可惜唱咗無耐已經被Alfred質疑「唔明點解要將兩首歌合埋」，又俾評判鄭融彈音準唔夠準。至於表演跳唱嘅Alice，雖然硬照靚過上鏡，但真人都幾可愛，跳舞都OK。不過可能無乜經驗，自信唔夠之餘，唱功亦有待改善。不過或者係Alice明知唔唱得，都要挑戰自己嘅呢份勇氣打動咗大家，Alice最終拎到晒盞紅燈，仲入埋梁祖堯嗰Team。
第二場對決就犀利啦，大家最期待嘅畫面出現了，就係兩位大熱仙氣靚女對決，即係20歲嘅Ivy So @ivyysooo 對上18歲嘅Candy Wong @candyw1219 。靚女程度去到邊？Ivy 俘虜咗攝影Crew自肥狂影福利鏡頭，肥仔@ERROR就一聽到Candy嗰名就識叫「靚女Candy」。Ivy靠親和力同甜爆笑容融入台前幕後，但性格比較內向嘅Candy，就喺綵排時俾花姐鬧「睇唔起靠樣入圍嘅人」，結果忍唔住喺鏡頭前爆喊，楚楚可憐嘅樣連Channel絲都忍唔住想幫佢抹眼淚，慘慘豬～
Ivy表演跳唱《Good Time》後，雖然歌喉唔得，但就成功令開播以嚟好少讚人嘅梁祖堯彈出一句「好鍾意佢」，不過就俾花姐問係咪盲咗⋯⋯而Candy就唔知鄭融係評判，變咗要喺原唱面前唱《紅綠燈》，一開聲就令肥仔由心心眼變嘔血，最後一盞紅燈都拎唔到，要跌入復活區。雖然二人實力都俾花姐大力質疑，又問係咪「靚女大晒」，但佢哋已經成功俘虜咗網民（仲有Channnel絲），有好多網民都喺討論區或者Facebook度反問返花姐，「靚女係咪原罪？」，仲話如果花姐兩個仔第時帶女朋友返屋企，一定「死硬」。
除咗仙氣對決，今集仲有位矚目人物，就係著名指揮家葉詠詩嘅囡囡Carmina @carminola ，Carmina同玩開Busking嘅對手丁丁 @tingting_fong 一樣擁有實力歌喉，但Carmina最終仍然三盞紅燈全取，成功晉身60強。Carmina一度因為家庭背景覺得壓力大而落淚，連花姐都話覺得佢比一般參賽者背負更多，但Channel絲認為只要參加得節目，一定都畀咗好大勇氣同付出咗好多汗水，例如上星期嘅燒賣妹妹都要好多科考勁高分先可以嚟比賽、而中大醫科生阿Wing更加稱得上係背水一戰，所以Channel絲覺得每位嘅努力都唔可以被抹殺，大家都應該被公平看待同關注㗎～
