今集打頭陣嘅係《造星IV》嘅第一個Rapper—Karen。喺綵排自創Rap《Queen》嗰陣，Karen Lur到爆嘅廣東話令Channel絲同花姐都完全唔知佢唱乜，之後正式表演嗰陣雖然變返全英，但Channel絲全場只聽到句Call me the Queen～I'm a queen～其他都係好Lur。至於本身係樂隊主唱嘅Sinnie，就帶咗首國語原創歌《做夢時我會找到幻想中的那個你》上台，好有台灣小清新音樂嘅感覺。雖然兩首都係原創歌，但一首係Rap，一首係Pop，好難有可比性，不過Channel絲就覺得Sinnie嘅演出比較容易令人投入，可惜佢最尾一盞紅燈都拎唔到，俾對手Karen成功搶先晉身60強。然而兩位導師一直揀唔落手㩒燈，最尾由評判Donald決定放佢入梁祖堯嘅組別。好多網民都覺得Sinnie輸得好唔抵，認為Sinnie外型、台風、歌喉都唔錯，唔明點解會輸俾Rapper。
第二場，輪到擁有高挑身形、深邃五官嘅穎蕎 Vs 因為笑容甜美而成為網民心水嘅Yanny。有自信令花姐對組女團刮目相看嘅穎蕎，雖然一開始面試時感覺唔唱得又唔跳得，但上台表演中英文歌跳唱嘅時候，Vocal又意外地唔錯，連鄭融都忍唔住一讚。至於望落有台型嘅Yanny，居然係一個大大喊包，唱唱吓會喊、跳跳吓都會喊，但或者係呢份真摯，令佢成功入圍。表演跳《愛情當入樽》啦啦隊舞嘅佢，雖然表演青春養眼，但因為無乜特色，加上首歌年代太久遠，最尾俾穎蕎以三盞藍燈贏出，進入Alfred組別。
第三組Battle，同樣有網民心水。係由為咗節目而放棄做醫生嘅咖哩，對上氣質派嘅Hannah。做慣醫生，為人大愛嘅咖哩，為咗照顧相熟選手嘅感受，試過幾次阻擋鏡頭，唔畀Crew影嗰位選手落淚嘅畫面。外型討好、有少少似趙薇，面試時被讚眼神吸引嘅咖哩，最尾因為跳唱《Price Tag》嘅表現未夠突出，被Hannah以精湛舞技擊敗，要跌入復活區。
呢集嘅最尾，仲有16歲嘅Ariel為大家帶嚟Popping。雖然同樣係最年輕嘅參賽者，但Ariel與上星期亮相嘅阿妹同燒賣唔同，唔係行可愛路線，亦都唔係行天真路線，鏡頭前嘅佢比較Cool，記者會時仲俾網民話佢西口西面，一啲都唔似16歲。Ariel喺練習時一開口就話覺得自己叻過上屆嘅20強、又話自信會有觀眾緣，Channel絲開頭以為Ariel仲係反叛期，所以態度望落先會咁寸，直到旁白透露佢曾經被校園欺凌，加上評判Alfred話其實Ariel有好多搞笑嘅一面，Channel絲想懺悔了。以16歲嚟計，Ariel嘅表演其實唔差，加上可塑造嘅外型，值得留低更多Round，希望Ariel可以畀啲信心自己，做自己先係最吸引㗎！如果想知Ariel入唔入到圍，大家今晚記得睇埋佢對手何佩嘅演出啦！
