相信有睇噚晚《造星IV》嘅大家，都對Sica @j.sicasi 嘅執生能力表示讚嘆，甚至要好似花姐咁樣讚Sica「叻女叻女叻女叻女叻女」。本身兩組嘅自選項目都唔係好得到評判嘅讚賞，但係Sica好似為B組帶返少少希望，加上B4組指定項目表現有起色，唔知會唔會可以一隊救全家，拎返一分，唔使額外再foul人呢？
A4組子涓 ＠ha_x912x 、Ada仔 @geungada 、安希婷 @e.foreve 、Ariel @oreohh 同埋Carmina @carminola 嘅自選項目《Lady繽紛樂》，嘗試帶返觀眾同埋評判返去Broadway嘅年代。花姐就喺綵排嘅時候大踩A4，直接話「你哋五個輸L梗」，令到佢哋都覺得就算輸都輸得心服口服，因為大家都不在狀態咁話喎。睇完表演，安仔 @on_callstar 就覺得佢哋「未係好夠唱功嘅功架，去駕馭呢啲咁classic嘅歌」，而卓韻芝 @cheukwanchi 就直情話睇唔到A4組《Lady繽紛樂》入面嘅繽紛。
B4組就好似俾人落咗降頭咁，暐翹 @wyllislwk 扭傷條腰，Liu哥 @samanthaliu614 就疑似氣管敏感，東東 ＠jazzicabbx 同Sica就一直都肚痛，不過原來最驚險嘅事，on show先出現。Sica喺自選項目《Come on, Bad Boy》入面，一個起身唔覺意向前仆，正當所有人都嚇親嘅時候，Sica繼續跪喺度跳埋幾拍先起身，唔知仲以為呢個位都係安排過，執生能力爆燈。網民都喺ViuTV facebook留言支持，「Sica識執生，又唔怕醜，回答評判失誤問題以笑回應唔尷尬， 能夠以佢自己嘅專長去幫到其他隊友，女團唔係唔畀佢入」咁話喎。不過安仔睇完兩組嘅自選項目，都話「好似feel唔到你哋覺得個過程入面好過癮，而你哋玩得好開心，冇呢個感覺」。
去到指定歌曲《來自天堂的魔鬼》，A4組嘅表現搞到導師同埋評判一路睇一路皺眉頭，安仔點名批評子涓失準之外，卓韻芝仲話佢哋「有少少似考完會考，考完喇……」嘅感覺。事後網民喺ViuTV fb都話「A組，走曬音都算，根本各有各想表現自己，點做女團呀」。
B4組嘅表演就同A4組感覺截然不同，Sica利用佢喺cosplay累積嘅經驗，幫組員變身成為八十年代日本街頭少年，將指定歌曲變成街頭打鬥場景。表演後，強尼 ＠ilovemyoq 都話要再次介紹組員，而喺死亡名單上嘅Liu哥，一句霸氣嘅「叫我Liu哥」即時引起B組嘅尖叫。評判們畀B4組嘅好評幾乎一面倒嘅，卓韻芝原來一直好期待呢種「有啲幽默感」嘅表演，吳雨霏 @ngk 就覺得B4組「可以好麻甩咁樣好型，覺得好好睇」。雖然網民都有微言，話B組取巧，指定唱歌但係一半時間都冇唱，不過都有人話「其實佢哋都係用drama嚟掩飾唱歌呢個弱點，咁啱今次呢四個放得開夠夾又玩得，所以恭喜女ERROR已成形」，仲話Sica今次係最大功勞。唔知最後，會係foul走兩次喺淘汰邊緣嘅Carmina，定係咁有霸氣嘅Liu哥呢？
