《全民造星IV》話咁快就嚟到第三個禮拜，喺夜晚九點半前，等Channel絲幫大家重溫吓上周五（12日）播出嘅第十集啦！
首先出場嘅分別係係聽個名都知有自信嘅Ace，同身形高挑嘅Tania。Ace唱歌、跳舞都有唔錯嘅根底，但星味同外形都爭少少；而Tania雖然喺面試時被批評「五音不全」，但全靠身形夠靚、外貌清秀，成功通過兩輪面試。到正式表演，跳唱《喘息空間》嘅Ace，不論係表演同裝扮都無乜特別亮點；輪到表演跳舞嘅Tania，舞藝唔錯、無特別甩Beat出錯，連埋佢本身嘅外形，評判已經收貨。雖然Tania講嘢多懶音又似乎無乜自信，但最尾仍然以兩盞紅燈出勝，而人緣甚好嘅Ace就跌入復活區。
接住落嚟嘅係Kay，身為陳輝陽女聲合唱團成員嘅佢，連梁祖堯都係佢Fans。雖然Kay來頭唔細，但對手Ana同樣都唔睇得小㗎～而家從事健力運動員嘅Ana，其實曾經患上過憂鬱症同厭食症，佢振作同康復嘅勵志經歷，都幾打動到Channel絲。表演空姐Theme歌舞劇嘅Kay，除咗個樣夠似空姐，唱歌同舞都無話特別吸引同突破，連導師同評判都有啲失望。而身形健美嘅Ana，唱《Take Me to Church》時一開聲就聽到佢聲底渾厚，同之前出場嘅Ika一樣咁唱得，連鄭融都忍唔住大讚「Very Nice」。最後Ana以兩盞紅燈擊敗Kay，率先晉級60強，並進入梁祖堯嘅組別。
壓軸嘅就係一場好友殘酷對決，係由出演過ViuTv神劇《教束》嘅Michelle Vs 演員余香凝妹妹、Tiger@MIRROR緋聞女友—余潔滢。由面試時嘅「開心舞」已經睇到Michelle為人比較「大情大性」，易喊但亦都會成日笑氹人開心。Michelle表演時為大家帶來《明愛暗戀補習社》嘅唱歌小劇場，好多網民都話呢場表演完全係「放送事故」，除咗尷尬都係尷尬。其實開頭幫評判探熱嗰陣Channel絲都仲頂得順㗎，但後尾「走先啦⋯⋯係咁先啦」嗰幾句真係徹底激漬Channel絲嘅防線，尷尬過關家姐呀⋯⋯不過真心講，同樣係喊包嘅Channel絲好佩服Michelle，一個靚女，可以唔怕尷尬，笑住咁完成晒成個表演，無跳跳吓流眼淚，已經好叻，係喊包嘅一大進步。
至於Michelle好友潔滢，就唱講出出軌心聲嘅歌《告白》，雖然潔滢幾靚女，但唱還唱，拎起件外套呢啲小演技，其實Channel絲都覺得有啲尷尬，可能真係好似導師所講，就咁唱會更加穩陣同出色。呢場好友殘酷二選一，Michelle最後只喺鄭融手上拎到一盞藍燈，潔滢則成功晉身60強，進入梁祖堯嘅隊伍。見到Michelle嘅眼淚，Channel絲好想幫佢打氣，正如評判所講，總有一日你會搵到適合表達自己嘅方法，到時你就可以將你真正有吸引力嘅一面展現畀人睇，加油～！
