《全民造星IV》30強賽事唔經唔覺已完成咗一半，噚晚（10日）播出嘅一集，係第一次見到兩組表演全部都有戲劇元素之外，亦都係B組首次唔係全組應戰，只得非大熱嘅Alice同Karen，而本身已列入死亡名單嘅Karen呢回仲要自己生死自己救！
喺第三輪對決，Alice同Karen就扮「GTB」嚟演出《怎麼可以吃兔兔》，對戰番前一集A組嘅《七個小矮人》。睇佢哋排練嗰陣，Alice其實都算扮得維妙維肖，連導師梁祖堯都話佢「好啱做呢啲嘢」；旁白君亦都話佢可能有八婆成份。相反Rap開嘅Karen就演極都唔似，就算出動到最具八婆知識嘅花姐指導，Karen仍然唔夠投入，花姐都話佢如果做得唔夠放，呢個演出將會輸。
但去到比賽一刻，Alice同Karen嘅「八婆」演出都令人眼前一亮，睇到評判拍晒手掌。釗峰先讚演出有內涵，覺得Karen令人好有深刻印象；Jay Fung亦都讚佢哋兩個好有個性；欣宜更形容係佢嘅「dream item」，想跳入去一齊表演，讚佢哋都有唔同嘅「bitchy」，亦鍾意Karen嘅厭世樣；迪偉亦都覺得佢哋演出好大膽：「好容易令人乞人憎，但你哋嗰兩個『吹咩』嘅attitude做得好好，又夠match，唔會一個搶（鏡）另外一個。」黃修平都讚佢哋排咗好多心思。
A組已入死亡名單嘅安希婷睇完都估B組勝出，覺得雖然得兩個人演出，但氣氛好正；結果亦如佢所料，B組獲4盞紅燈再贏一仗。安希婷被foul後分享感受時，都忍唔住流淚：「我都佩服自己，因為自己一個人湊住小朋友去玩比賽，又識到好多女仔，所以行到呢度學到好多嘢，已覺得好滿足。」
之後一輪對決，A組嘅Ika、Win Win、So Ching、Ashi、芯駖、穎蕎同超酸演出《This is me》，繼續晒唱功之餘亦加入咗戲劇。欣宜睇完覺得好大感觸，感受到佢哋演出好有passion，「最感動嘅係因為Ika，你冇俾之前影響你performance，反而你真係想話畀大家聽『hey! this is me!』」黃修平亦讚佢哋喺視覺上處理得好好，識得運用形象將每個人特質發揮出嚟，又讚佢哋服飾好得，「完全係大show水準」。不過迪偉就略嫌演出唔足以將首歌喺今次現場表演再昇華到一大級，雖然佢都讚lka唱得好，但「點解個focus只喺一個人度？」佢同Jay Fung都覺得穎蕎可以唱多啲。而A組呢輪死亡名單係Ashi，但評判對佢嘅評語都係一般，覺得佢雖然努力，但都係「差啲」。
至於B組就再一次10位成員上陣應戰，演出《未知道》。佢哋用枕頭做道具，砌出金魚、屋仔、樓梯、雀仔同雲，代表之前比賽時嘅元素。主持強尼事後幫佢哋交代來龍去脈畀評判知，但迪偉就覺得「你哋會知道評判係會無睇過你哋之前performance，呢個都係你哋揀一條『橋』做創作時要諗埋嘅嘢，我哋睇時就會無共鳴，唔應該要強尼畫出腸」，不過後台嘅梁祖堯就話無咁諗，覺得放大咗；Jay Fung亦覺得Gao嘅演出到目前無好大參與，想睇到佢哋每個人多啲演出，但Gao就預告下輪會出場。至於黃修平就繼續撐，話B組嘅話劇「非常之夭到佢，可能呢啲好personal」。
