經過兩回惡戰，第三輪對決嘅結果喺今集揭曉，評判再經歷兩難。最尾由Liu哥、Sica、東東、瑋翹嘅B4組取勝，評判安仔就話喺佢地身上見到創意，伍仲衡就話覺得有少少胡鬧，Talent上會想畀A4組贏。
A組輸，就意味要淘汰Carmina，而其他組員見到隊友要被淘汰，Ariel、Ada仔都喊到成面眼淚，但安希婷（Evelyn）就畀好多網民鬧佢疑似「偷笑」，話佢幸災樂禍等等。Channel C事後有嘗試問返Evelyn佢當時嘅感受，雖然截稿前佢仲未覆我哋，但Channnel絲覺得，人唔一定傷心就會喊嘅，況且由Evelyn嘅經歷就已經睇得出，佢份人本身應該比較Tough。
接住落來就係兩組音樂人對決，而喺自選項目中，大家都選擇表演原創歌。A3隊員係Tengie、VAL、YoYo同筠兒。Channel絲覺得佢哋首《Fake it》其實幾有女團味，不過可能同評判Sunny講嘅一樣，如果裝扮上可以特別啲、配合返歌曲主題就更加好。有唔少網民睇完佢哋作曲磨合嘅過程後，都話覺得Tengie為人「太串」，唔係好適合團體表演，但Tengie喺台上面真係有佢嘅獨特魅力，表現好亮眼。
至於B5組就由Karen擔當隊長一職，組員有Ana、Winka同阿杰。雖然祖堯曾經講過唔會再畀Karen Rap，但今次佢就特登請嚟本地知名女Rapper Shimica擔任監製，協助佢哋完成原創歌《DO IT RIGHT NOW》。到正式表演時，Winka又再次令觀眾耳朵懷孕，而Karen亦都不負眾望，成功Rap到廣東話之餘，亦都比以往清晰好多。而Ana同阿杰亦都非常有台型，尤其可能因為首歌嘅意思幾配合Ana以往嘅經歷，所以勁有Feel！評判Kary畀評語時都大讚Winka唱功叻叻，又話4位組員都好有台型，而Karen亦成功反轉第一輪評判對佢嘅評語，令卓韻芝大讚佢有Power。
跟住落嚟就係指定歌曲表演《浸浴》，Channel絲覺得今次個Stage同裝扮都好靚，但評判就似乎唔太滿意佢哋嘅表現，伍仲衡更加點名話Yoyo同筠兒走音，成組整體嚟講唱得唔夠感情。Alfred亦都話Yoyo同筠兒今次表現失準，Kary更加留意到Yoyo喺台上眼濕濕，而Yoyo就解釋係因為太緊張、唔滿意上一場嘅表現，所以有啲擔心。嗚～唔好喊啦，其實觀眾都Feel到你哋好用心準備表演㗎！
下一集睇埋B5唱《浸浴》就會公佈今輪嘅賽果，節目透露A、B組嘅死亡名單分別係筠兒同Ana，兩位都係性格好好嘅參賽者，真係唔捨得呀！
