《全民造星IV》30強名單誕生，噚晚（7日）播出一集因為B2組喺最後一輪對決落敗，所以除咗死亡名單上嘅Mic被淘汰外，B組要再揀多5人出局。導師梁祖堯公佈前都話，喺呢個仆街賽制下，被選中嘅5位冇嘢唔好，只係無奈要選擇而已。結果呢回合小組賽贏咗嘅Liu哥、執生擔當Sica、Ana、阿杰，另外仲有Zoe都被淘汰，相反因為表現失誤連累隊友出局嘅方方就有得留低。
噚晚係A1組同B2組指定項目嘅對決，佢哋要演出指定歌曲《救命歌》。兩組成員都將歌曲重新編曲，B2組就扮成師奶以喜劇演繹，令評判們、導師、節目監製花姐同其他參賽者都睇到係咁笑，最後亦得到評判一致讚賞，可惜因為自選項目演出未如理想，結果5位評判一致揀A1組勝出，Mic只能40強止步，而B組嘅Liu哥、Ana、阿杰、潔瀅同Sica，就因為賽制被逼foul走。經過今次小組對決，B組得番10人，A組就有20人。
唔少觀眾都喺ViuTV facebook專頁留言，話要還我Sica、Ana、阿杰、Liu哥，「贏咗嗰組都要foul兩個走，極度唔公平」、「方方出錯，表現又無突破又無驚喜，但竟然可以繼續係到！？其實講唔通好難怪俾人話偏私」、又話阿mic做得最好又要Foul 阿mic??? Alice走曬音都唔foul???」、「原本我尋晚睇左祖祖篇長文都覺得可能係我偏見太肉緊，過埋今晚真係咩藉口都接受唔到。」
雖然觀眾插爆，但被foul嘅幾位成員都喺ig力撐導師，其中Sica就感激阿祖無條件付出，「我好想多謝你，你真係一個好有心嘅導師，一個心地好好嘅人。節目剪出嚟嘅時間同內容有限，但你為我哋付出嘅時間同心機遠超於大家嘅想像。你幾乎每一晚都陪我哋留到好夜，幫我哋安排好多好有意義嘅exercise，每一輪都逐個女仔畀一個方向我哋去成長突破，......好慶幸我做演藝呢條路上面嘅起點係喺你個studio（當然我都好希望可以繼續行到落去！）我真係好好彩可以入到嚟b組！！」
Sica又話自己只係早少少離開《造星》舞台，知道可能大家會唔捨得佢，好開心原來自己有人支持，但希望大家唔好唔開心咁耐，「好希望我重視嘅人冇一個會俾人攻擊，佢哋從來都冇欠過我任何野，相反畀咗好多嘢我，比我想像中多太多。」佢仲好謙虛話自己有不足地方，「始終十個名額真係好有限，其他入咗去嘅人都好好，佢哋都好值得繼續行落去㗎，加上嗰陣時都冇灰心太耐，好快振作返了！」
Ana亦都話雖然40強止步，但都好滿足，「非常之幸運可以入到阿祖呢組，佢令我認真明白表演同埋舞台係乜嘢嘅一回事?阿祖真係用咗好多自己嘅金錢、時間，就算自己有show都用晒自己成副心血心機，係明明自己難得可以休息嘅時間，都去take care我哋每一位。」Ana又承認自己對舞台同埋其他方面有不足，需要改善，但承諾會繼續努力 ，唔會因為咁樣而放棄。
Liu哥都話係呢個節目最大得着，除咗係舞台經驗，所有嘢迅速進步，更開心係重新認識咗自己同認識到一班好朋友，特別係B組嘅得得B們，「雖然今日行到《全民造星4》嘅盡頭，但我相信今日只係我入行嘅起點。無論點我都唔會放棄表演，所以大家記得期待下，繼續支持下我啦！」
#全民造星IV #女團 #Sica #Ana #阿杰 #Liu哥 #Zoe #Mic #Alice #Gao #方方
#全民造星IV #女團 #Sica #Ana #阿杰 #Liu哥 #Zoe #Mic #Alice #Gao #方方
