「還我咖喱～！」唔少《全民造星IV》觀眾包括Channel絲睇完噚晚（1日）一集都咁講，因為原來佢被導師梁祖堯列入「死亡名單」！而佢所屬嘅B3組完成指定歌曲《狂人日記》後，評判幾乎一面倒批評，最終以5盞藍燈輸畀A5組，甚有觀眾緣嘅靚女醫生咖喱要喺40強止步。
梁祖堯話因為咖嘅進步比其他人小，「唔係話我個人口味唔鍾意佢做某啲嘢，但當我想改變佢一啲嘢時，佢改變唔到」。不過觀眾就唔係咁睇，唔少網民都喺ViuTV fb留言撐咖喱，甚至去梁祖堯鬧佢foul走晒觀眾鍾意嘅參賽者，「醫生都做到咁仲想點，佢係需要累積表演經驗，仲有好多可能性囉...無理由咁早出局」亦有人覺得咖喱有自己諗法無錯，「唔係佢唔進步，或者佢唔順，聽話就可以唔foul就好錯！」
有網民就覺得B組太着重戲劇，「點解梁祖堯唔請外援教下B組唱歌，畢竟真係要識唱歌，下下都做drama但又做得唔好，佢自視過高累咗班參賽者！」亦有人認同A組噚晚係值得贏，「只係走嘅唔應該係咖喱！佢係一個有潛質有觀眾緣有星味更唔係大眾樣嘅女仔！」有人質疑梁祖堯明唔明咩叫觀眾緣：「一個人就算幾有talent但冇觀眾緣係冇用」。梁祖堯就回覆，錄影時確實無得預測觀眾嘅口味，「所以你啱㗎，嗰一刻，真係冇人知乜嘢係觀眾緣」，又強調「可以揀我個個都唔想foul」。
講返噚晚比賽，咖喱、榛綦、潔滢同Ivy So嘅B3組嘅自選項目《猜‧情‧尋》將兒時遊戲融入歌曲及戲劇入面，梁祖堯事前再話呢個回合演戲係比唱歌重要。不過結果亦得到評判唔少好評，其中卓韻芝大讚好睇，「我感受到嗰份感情，你哋拍手嗰下真係有戲味，同埋我亦睇到你哋有唔同性格」。陳健安（On仔）就讚Ivy So外表特別有仙氣，喺後台嘅歌手鄧小巧同經理人Wing都即刻話咖喱都好有仙氣。
不過陳詠燊（Sunny）就「雞蛋裏挑骨頭」：「點解咖喱隻手有一條手鏈？成個構圖我係咪甩咗啲乜？因為你哋連髮飾都冇顏色，全部夾得好，但你又着短袖，我嗰下突然有啲抽離。」咖喱就解釋因為條手鏈係佢婆婆畀嘅。Sunny又話潔滢喺佢面前唱歌時，「對眼係失焦咁唱，你畀到嘅信息我，係你進入緊自己嘅世界。」
之後到表現指定歌曲《狂人日記》，雖然對兩組都好大挑戰，但Ika、Day、超酸、 穎蕎同芯駖嘅A3組繼續得到評判激讚。但之後到B3組表演後，卓韻芝就即刻話「全部都唔係你哋熟嘅嘢嚟嘅」、「想知道佢哋頭先幾冇信心？或者要有幾多勇氣先做到呢個work？我睇到佢哋嘗試......，但未成就到係一個演出嘅作品。」除此之外，評判亦覺得演出欠爆炸力，音準有好大問題。不過On仔都讚咖喱造型有驚喜，有小醜女感覺。可惜經過兩項演出之後，B3組一盞燈都冇，死亡名單上嘅咖喱就被foul走。
