今次《明星Q&A》有幸請到藍奕邦做獨家專訪，將會一連三個星期日為大家放送，第一集他分享了情緒病來襲的情況，形容「辛苦過死！」。
說了很多年「#藍奕邦歸位」，連藍奕邦自己都笑言：「好似狼來了咁」，多次以為休息下就無事，卻發現原來是自己未意識到情緒病來襲，「係頗辛苦嘅病，需要好長時間慢慢恢復，好多人唔明點解我要停工咁耐，係真係要停咁耐！」藍奕邦憶述最初以為自己有痛症，因而引發情緒病，「條頸成日痛，開始越嚟越多痛嘅地方，坐骨神經，甚至視力模糊，嗰時仲未太意識到係情緒病。」後來才發現原來是身體以痛症來向自己發出警號。
【新聞有價 記者有格 立即訂閱：https://bit.ly/3wGQh7c】
患上情緒病的日子，藍奕邦經常失眠，由平常睡7至8小時，慢慢減到5至6小時、3至4小時，最後只能睡半小時。當時他仍然在環球唱片工作，即使只能睡半小時，翌日仍能開工，「唔知點解個人好精神，表面上好精神，但內裡非常疲憊。」他形容就如被人按下「Turbo掣」，腦筋不停運轉，不停胡思亂想，「臨停工前每次出嚟做嘢，身體都喺度震！」
2015年，是藍奕邦狀態最差的時期，「要去睇精神科，食咗一年精神科藥物。」藥物令他渾渾噩噩地工作，「我形容係截斷三感，感情、感性同感觸，好似對所有嘢都無感受，作為一個創作人竟然無咗接收靈感嘅能力，我覺得比死更辛苦，好痛苦。」於是，藍奕邦決定停藥，但知道停藥後會有危險，亦加上忍受不了香港的生活，便選擇回加拿大與舅父舅母生活，在有安全感的環境下休養。藍奕邦表示最初的半年多數睡在床上打機，「揸車出去買杯咖啡，或者遊少少車河，都唔敢揸太遠，有時喺高速公路，都突然要打死火燈，泊埋一邊，扯蝦唞氣。」後來他透過一些書籍，了解到情緒病是源於焦慮、驚恐和壓力，再配合治療師的幫助，慢慢發現有些痛症開始消失，亦能夠重新接收資訊，「係好慢嘅一個康復」。
至2017年，藍奕邦開始覺得，如果繼續留在加拿大會令自己變懶，剛巧當時鄧小巧鼓勵他回港，「我記得喺電話度同佢講，我慢慢康復，想返嚟試下香港生活，但有個好棘手嘅問題，就係返嚟香港要自己一個人住，我覺得我未有信心。」鄧小巧爽快地回應，提議他搬到她錦田的家暫住，住到適應為止，於是，藍奕邦帶著兩個篋回來香港。
藍奕邦曾經說過，「無鄧小巧，就無依家嘅藍奕邦！」二人從《超級巨聲》時以評判與參賽者的關係相識，到小巧製作第一隻碟時變成合作伙伴，到成為室友互相扶持，藍奕邦形容關係尤如親人。以前的藍奕邦不想別人幫，亦不想幫人，尤如一個「密封罩」，但近年他與小巧經常一起做創作，令藍奕邦自己也昇華了，「因為小巧好多歌都係療癒系嘅歌，以前我寫嘅歌詞比較硬梆梆，好硬頸，有種我死都要好強悍，但填咗小巧嘅歌就發覺，有時做人唔使下下都咁硬淨，都可以承認自己嘅脆弱，有所謂嘅Weak Moment，之後我嘅作品都多咗啲同理心。」
藍奕邦又笑言自己是藝術家性格，「想一個人，但又好怕一個人；想有空間，但又怕寂寞；想有人欣賞，但又不想被不明白的人欣賞。」雖然是很矛盾，但就因為矛盾，人生才好玩，「當經歷過一啲大事件，思維上，點樣睇呢個世界係有唔同，甚至近幾年發生咁多事，嗰個苦中作樂，或者點辛苦都要生存落去，呢個精神好貫徹喺近兩三年我寫嘅歌入面。」
下一集，藍奕邦大爆舊公司不敢安排工作給他，更曾要求他改筆名，究竟他是如何面對被封殺的壓力？下星期日9pm密切留意。
