黃子華、許冠文、衛詩雅等主演的電影《破．地獄》打破多項本港票房紀錄，今晚舉行「千人慶功宴」，黃子華及許冠文獲英皇老闆楊受成送贈厚禮。兩位笑匠期望3年內可以合作開拍喜劇。
英皇電影《破．地獄》上映個半月，截止今日傍晚票房高達1.44億，更打破11項本港電影紀錄。老闆楊受成率領創作團隊包括導演陳茂賢、主角黃子華、許冠文（Michael）、衛詩雅、周家怡及朱栢康等，到紅磡一間酒店出席「破．紀錄 千人慶功宴」，筵開逾80席。而海兒、沈震軒、VIVA等英皇歌手則擔任表演嘉賓。
一眾演員除獲楊受成頒發金牌外，黃子華更獲贈價值20萬的名貴紅酒Domaine de la Romanee-Conti，子華表示有次同楊受成食飯時，指自己一世都不會有機會品嚐這枝貴價紅酒：「就算佢請我飲的都唔夠膽飲，除非票房成績好好。老闆應承話歸到本贏100蚊都請我飲。我諗住係老闆開咗一齊飲，佢依家（成枝）畀咗我，咁我責任重大，呢枝係我飲唔起嘅酒。」他續指謂楊生笑言如果將來他生女就開這枝酒，更搞笑說：「我徵求大家有冇人同我生個女，如果唔係我呢世都冇資格飲呢枝酒。」而許冠文則獲贈俾勞力士「綠水鬼」Submariner，他透露兩個月前戴着於深圳購買的50元手錶與楊生食飯，發夢都想不到獲對方贈送名貴手錶。
黃子華與許冠文一同接受訪問，講到電影做出多個好成績，子華非常幸運及榮幸有機會參與：「如果香港套套戲都咁蓬勃，係一件非常好嘅事。」對於《破．地獄》加長版或於農曆新年上映，許冠文指楊受成邀請他參演時，他指不適合新年上映，對方跟他說：「仲諗呢啲嘢，百無禁忌，好睇就得。」他又問身邊朋友，有一半亦覺得冇問題，笑言屆時票房可以有3億。而子華指想電影延續至賀歲檔：「代表香港人豁達，賀歲大家唔介意入去睇，證明大家冇咩驚。」
兩大笑匠同表示，希望再合作可以拍一套喜劇，問到是否想原班人馬再合作，許冠文說：「最好啦！我同子華30年前都有個夢但做唔到今次我都同佢講，我哋一生講笑話搞喜劇，要搞番部喜劇令觀眾覺得唔同以前，心態上係好難設計，設計成功係未來喜劇另要一條路。」子華亦說：「依家最大挑戰就係Michael想搞喜劇諗咗30年，希望3年內諗到。（兩個一齊創作？）佢做總舵主。」兩人3年內是否有機會再合作，子華笑說：「佢過去30年，年年都覺得有機會。」許冠文則希望3年內可以拍到一部喜劇，對香港人有個交待。
問到許冠文再否正構思喜劇，他說：「本來寫咗，覺得可以試吓。但《破．地獄》令大家又有新睇法。觀眾好清晰話只要係新，大膽嘗試就得。」至於兩人會否合作舞台劇，子華代答說：「佢唔鍾意重複，我唔怕唔會覺得悶。」
