《東張西望》主持人「一蚊Joe」游莨維昨（10日）採訪中環槍擊案嘅警方簡報會後，喺社交平台出嘅一句帖文：「MJ我雖然唔係港聞記者，但係2010年我採訪馬尼拉人質事件嘅時候，你畢業未呀，港聞記者？」結果引來傳媒人，包括現職或者曾任職嘅港聞記者不滿。
帖文無提點解爆seed，只係有幾張佢簡報會現場嘅相，但出咗大概3個鐘，到夜晚7點幾就被del po。直到夜晚11點左右，一蚊Joe才po長文講返原因，話當時做圍訪，要鬥快擺咪，爭取中間位置，但佢擺咪同收咪時，「被一位後生嘅『工作人員』不斷單打，話『東張西望都嚟採訪，阻住晒～』。」一蚊Joe認為大家都係做嘢，提到自己由2008年開始，已開始採訪生涯，「當中受過的冷眼和冷言冷語已經不計其數，結果今次谷住啖氣」。
佢亦提到自己雖然聽得太多「冷嘲熱諷」，但唔應該勞氣唔，認為「如果一笑置之，根本唔會有件咁嘅事發生」；亦唔應該稱工作人員為港聞記者，「其實佢應該係一位後生嘅技術人員，應該體諒喺落雨嘅情況，要做好新聞採訪，大家都不容易」；同埋唔應該引馬尼拉人質事件，因為雖然係「我採訪生涯感受最深的一次。但忽略會勾起相關人士的回憶，是我不對！」所以佢因此del上一個po，仲話「在此鄭重向『事件』影響的所有人道歉，對不起。」
不過，一蚊Joe又話，做任何事應該「尊重自己的專業」，認為「如果我去做採訪，係翹埋雙手等收工，咁就真係『阻住晒』，好似今次，我問咗『對上一次持槍傷人係幾時嘅事？』」仲話其實仲有問題想問，但尊重記者會可提問次數，所以無問。
