ViuTV劇集《IT狗》大結局圓滿落幕，眾人對Moby嘅收購計劃未有動搖，而阿信（凌文龍飾）仲成功揭露AI Moby真相。而阿信一段長達3分鐘、對於香港創科未來嘅Solo對白句句到肉，可以話係成個大結局嘅精華。
「或者到咗呢一刻，你仍然覺得我哋呢班人蠢，但係我話畀你聽，香港創科欠缺嘅從來都唔係乜嘢技術，因為最好嘅技術，我哋20年前已經擁有過，真正令到呢個城市停滯不前嘅，亦都唔係你所講嘅無知同埋短視，而係我哋對香港創科都已經失去咗信任。」
阿信踢爆AI Moby背後其實係想令到呢個世界冇愚蠢嘅人，但係就話其實令到創科停滯不前嘅，根本就唔係蠢人，而係缺乏信任。
「我哋實在經歷過太多欺騙、出賣，所以每一個人都習慣咗喺俾人出賣之前，先將自己賣一個好嘅價錢，你所講嘅無知其實係一種世故，你所講嘅短視其實係一種無奈，佢哋嘅問題唔係蠢，佢哋係太過聰明，聰明到明白眼前嘅利益先至最值得信任；但係就算係咁，我知道仲有一班唔夠聰明嘅人，為咗自己嘅夢想，為咗呢個城市嘅未來艱苦前行，或者佢哋就係你所講嘅蠢人，但係我同你講，佢哋先至係一班有信念嘅人，只要我哋每一個人都堅守自己嘅信念，我哋一定可以追番失去咗嘅20年，搵番一個真正屬於我哋自己嘅未來。機會從來都唔需要人哋畀，機會係留畀有信念嘅人。」
編審Iris就喺IG話：「在大家忙著將自己賣個好價錢的當下，你會發現善良比聰明更難，聰明是天賦，但善良是種選擇。這些年，我們為著不同原因不再憤怒，時間過去，最先衰老的，原來不是容貌，而是那份奮不顧身的衝動。致各位，『機會是留給有信念的人』」。
沉澱完一晚，大家又覺得大結局點呢？同埋，Channel絲真係好耐冇試過追劇追到咁肉緊，好似重拾睇電視嘅樂趣，有冇人有同感？?
