英女王伊利沙伯二世周二（17日）驚喜現身倫敦柏靈頓火車站，為以佢命名嘅倫敦鐵路伊利沙伯綫揭幕。其間，職員送咗一張Oyster card，即英國版「八達通」畀英女王，仲教佢增值時要將卡放喺讀卡器上。雖然英女王之後都未必需要用，但佢都好認真去學，問返職員「即係呢度？」同埋問「可以去到幾遠？」當佢知道可以去到修道院森林站，英女王就好滿意咁讚好「Oh nice, splendid.」
英女王呢日身穿鮮黃色套裝，持拐杖，喺愛德華王子陪同下到場，逗留咗約10分鐘，今次係佢近兩個月來首次到訪溫莎以外地方。有份出席儀式嘅英國首相約翰遜都話好開心。
96歲嘅英女王今年初確診後，早前白金漢宮亦指佢行動不便，所以缺席國會開幕大典，係59年來首次。不過呢幾日佢就密密公開露面，上周五（13日）現身皇家溫莎馬展之後，周日（15日）就出席在位白金禧紀念活動。
講返呢條貫通倫敦東西部嘅伊利沙伯綫，係由港鐵負責營運，原名係Crossrail，原訂喺2018年通車，但由於施工困難、安裝訊號系統出問題等影響，導致工程超支、延誤，最後延遲到5月24日正式投入運作。
