4月21日係英女王伊利沙伯二世96歲生日，英國皇室今日就喺社交平台發佈了英女王2歲時相片，回顧了事頭婆的童年。
帖文提到，今年亦係英女王登基70周年，亦係英國歷史上第一位任期最長嘅君主。但事頭婆童年時無諗過成為女王。直至1936年，愛德華八世退位，事頭婆爸爸登基成為國王喬治六世，年輕嘅事頭婆成為繼承人。到1952年，事頭婆爸爸不幸去世後，年僅25歲嘅佢就成為英女王伊利沙伯二世。
除咗童年照，皇室較早前亦發佈事頭婆同佢兩隻白馬Bybeck Katie、Bybeck Nightingale合照，而呢張相係攝於上月英女王身在溫莎堡，為同系列相嘅第4張。
事頭婆嘅健康一直備受關注，佢今年2月確診COVID-19後，已經康復。上月曾出席已故丈夫菲臘親王嘅悼念儀式，係近半年來首次喺溫莎堡以外參與大型公開活動，但皇室日前喺溫莎堡舉行嘅復活節禮拜，事頭婆就未有出席，係佢50多年嚟第一次。有外媒就引述皇室消息指，英女王健康良好，只係行動方面有問題。
