蘇韻姿（Andrea）為音樂劇獨挑大樑，獻唱10多首經典歌曲。她坦言最大挑戰一定是中文，更被容祖兒的《越唱越強》歌詞及節奏考起。
蘇韻姿日前為音樂劇《我們的青春日誌》番外篇《Nancy勞軍SHOW》獨擔大旗演出，又跳又唱，獻唱《浮誇》、《酷愛》、《越唱越強》、《可惜我是水瓶座》等10多首經典歌曲，她更自爆被《越唱越強》考起：「要演獨腳戲，心情超緊張，演出前一晚我不停Loop啲歌，最難係《越唱越強》，我覺得自己越唱越弱，因為啲歌詞好密、節奏好快，好似急口令咁，我睇容祖兒演唱會，見佢唱得好輕鬆，但我唱就好難，覺得祖兒真係好犀利。」
Andrea在今次音樂劇中除了在舞台演出外，亦參與幕後創作，包括度橋及服裝統籌，她指2023年已經有這套番外篇的構思，不過要有晒劇本同排練，就3、4星期先開始，所以籌備時間都好趕，過程中最大挑戰一定是中文：「好多歌詞同對白都好難背，加上難度好高係成個騷一個人hold，如果唔記得台詞就冇人救自己，所以要好熟，同埋喺現場會同觀眾有啲互動，執生好重要，真係好大挑戰。」
此外，她透露簽約新公司後，將在幕前有不同的嘗試及演出機會，包括與HOYTV合作不同節目。她指早前與陳思圻返內地拍攝一個新年節目，兩人接觸好多新年的傳統文化，感覺好有趣。
