尹光與組合One Up於銅鑼灣行人專用區進行快閃活動，今次踩晒入姜濤灣地頭，光B笑言：「乜灣都冇問題呀，你叫尹光灣都得㗎！」
尹光昨日首次於銅鑼灣街頭載歌載舞，問到知道這個位置叫姜濤灣？80歲的光B一點也不脫節，「知！係的登揀呢度㗎！（想挑戰姜B？）唔係，叫乜灣都冇問題呀，你叫尹光灣都得㗎，任得你叫！我唔係想將姜濤灣改名。」
尹光坦言今次跳街舞玩得好開心，因為自己最鐘意同後生仔合作。他表示之前同MC JIN、One Up一齊唱首洗腦歌同跳舞拍廣告，自言是老中青三代Rapper。
尹光透露新歌叫《命硬80》，保持體力方法係日日有運動：「我一日行近萬步，最少都7千步，做人要漫步人生路嘛！。我一星期打幾日乒乓波，噚日先同方力申打完，佢幾好波㗎，不過都係我贏佢少少，哈哈！同佢鬥游水就梗係唔夠佢啦！」
Bronny喜見偶像
4人拍攝廣告期間又唱又跳又Rap，氣氛高漲，難得同前輩合作，OneUp亦化身「小徒弟」，Bronny不諱言第一時間有拜師學藝的感覺，他直言有被兩位前輩的氣場所震懾。Bronny透露在廣告中大多時與光B同場上陣，不過最叫他驚喜絕對是跟MC Jin見面，他說：「MC Jin可以話係我偶像，我喜歡Rap都係因為聽MC Jin Rap而開始，能夠初出道就同對方合作，感覺好夢幻！」
傾偈舒緩緊張
至於Oscar亦大感榮幸能與兩前輩合作，他坦言平時只能於電視上見到兩位，今次見到真人對廣告效果大感期待：「光B係現場中最有活力，思想比後生仔更年輕，無時無刻都充滿正能量。而且佢好nice，唔單止同我哋影相，仲好大方教我哋點樣擺Pose得意啲，見我哋緊張，又同我哋傾偈，幫我哋舒緩緊張情緒。」
此外，尹光及MC Jin今次是相隔12年再合作拍廣告。MC Jin即場把握機會約定尹光12年後再合作，不過向來惹笑的尹光竟然當場「拒絕」，反建議說：「唔好呀嘛，兩年一次啦。唔好講12年，你知我咩年紀，12年之後都唔知自己去咗邊！」此言一出，令全場哄笑，MC Jin即回應：「你大把時間啦，約定2036見！」
