「宇宙最強」甄子丹女兒甄濟如（Jasmine）近日推出首支廣東歌，由於不諳廣東話，Jasmine透露有一定難度，幸有同事幫她執咬字，坦言用了很多時間去錄音。
【新聞有價 記者有格 立即訂閱：https://bit.ly/3wGQh7c】
甄濟如的廣東歌《次次》由她親自執筆創作旋律，製作demo時更寫下了甜絲絲的英文歌詞，內容講述情竇初開的女生，面對傾慕對象若即若離的表現的不安心情。首度灌錄廣東話作品，對於不諳廣東話的Jasmine來說也有相當的難度，她坦言：「今次係錄音最慢嘅一次，嚟到拍攝MV當日都仲未錄完，但我有同事同我一齊練習廣東話，練咗好多次執我嘅咬字。」
歌曲MV的劇情亦按歌詞構思，所以團隊特別請來林愷鈴的弟弟林卓毅（Addison）飾演男主角，讓Jasmine在鏡頭前演繹這個曖昧故事。其實Jasmine本身跟Ashley熟稔，但Addison卻是在拍攝MV當日才第一次見面，Jasmine表示都需要時間投入角色，她表示歌曲意思同自己本身性格不同：「我未試過好似歌詞所講嘅咁樣去做，所以我當係演繹緊一個故事裡面嘅角色。同Addison都係第一次演呢類劇情，所以一開始係有少少尷尬，唔係好習慣，但後來發現原來個過程都幾有趣。」
Addison首次參與MV演出，當收到邀請時也感到十分驚訝，並說：「雖然驚訝，但同時亦好期待，因為係一個全新嘅體驗。」被問到合作的感受，Addison讚賞Jasmine道：「本身唔認識，但見真人發覺佢好活潑，同埋個性好樂天，同佢合作好好玩。收到call要我演出嘅時候係緊張嘅，但Jasmine令我好放鬆，所以都可以投入其中，亦唔覺有尷尬場面出現。」首次演出後Addison也愛上演出MV，更搞笑道：「如果我家姐有MV想搵男主角，都可以搵我演出㗎！但要佢邀請我先得囉！」
雖然今次MV拍攝時間頗長，但Jasmine並無任何怨言，更說：「之前拍其他MV例如《慣性倔強》全日要拍外景，又熱又多蚊，仲要喺炎熱天氣下着厚衫，實在好辛苦，今次喺室內拍攝，好chill又簡單，較易handle，當中我特別鍾意一開始第一個scene要我扮瞓着咗，因為攤喺張床真係好舒服！」
