陳柏宇（Jason）與何洛瑤（sica）合唱新歌《可靠我》，MV亦有兩位可愛女兒粉墨登場參與演出，兩位小寶貝都十分黐 Jason，拍攝現場上演了一幕爭寵的戲份。
【新聞有價 記者有格 立即訂閱：https://bit.ly/3wGQh7c】
新歌《可靠我》唱出了不限年齡、輩份、關係的互相依靠關係，只要彼此有連繫，就能成為引領對方前路的一束光，人生也會漸趨美好。Jason對於歌曲這份信念感受很深，面對兩個仍然年幼的女兒，向來有擔帶的他，也感受到她們對自己的重要性：「佢哋成長過程中需要我嘅照顧同教導，但同樣地我嘅生活都需要佢哋，因為佢哋係我嘅生存目標、工作動力，彼此嘅關係係雙向。」
至於歌曲MV裏，女兒陳羿辰（Abi）及陳星晴（Audrey）亦參與了今次的演出，Abi更是自《後排慶功宴》後再次參演 Jason 的 MV。Jason與Abi在茶餐廳內一起吃早餐，整個過程就如平時早上開IG直播一樣，不過Jason大讚Abi道：「Abi今日（拍攝當日）食嘢係明顯正經同快好多，因為佢知係要拍佢食嘢，但佢做得好好，超越咗我幻想佢會出現嘅怕醜、唔想做、唔肯做、尷尷尬尬嘅佢，今日係超乎我想像地完成佢嘅部份，仲比平時食得多嘢。」
至於年紀較小的Audrey亦不怕生保，在鏡頭前真情流露，與Jason溫馨互動，可愛至極。鏡頭外，Abi與Audrey都十分黐Jason，不時要牽着及攬着Jason的手或腿。有時Jason只照顧其中一個的時候，另一個就會纏着他不放，結果在現場就不斷上演爭寵事件，不過Jason 都十分細心，輪流氹兩個女兒開心，甚至左右手分開抱着兩個女兒遊走整間茶餐廳，所以女兒也沒有任何投訴，Jason的臂力更是令人大開眼界！
在MV的故事設定上，Jason經過特技化妝化身成為年老的「陳伯」，幻想自己老年後面對女兒的情景。特別問到對於女兒將來的狂想，可有想過她們將來是屬於文靜或是好動類型，Jason坦言：「兩個可能性我都有幻想過，但唔一定係三歲定八十，因為唔單只係將來會經歷嘅嘢，仲有佢哋天生應對事情嘅轉變模式，所以我完全估計唔到將來 Abi 同 Audrey 大個會點，但以佢哋而家嘅性格去睇，佢哋都係偏向 outgoing（外向）。」
MV 裏面有一幕是女兒說自己要奉子成婚，問到如果發生在自己身上會有何反應，Jason搞笑道：「睇下佢幾多歲，如果三十歲奉子成婚，我會話『好呀！』；如果四十歲我會鬆一口氣『終於都嚟喇！』；如果十五歲同我講奉子成婚，就梗係唔同啦成個反應！」說到未成年要奉子成婚時，看見Jason作狀起腳，就知道他對於女兒有多着緊。
