鄧俊文及謝影雪這對「鄧謝配」於今屆奧運羽毛球混雙項目賽事 8 強止步，兩人賽後受訪時哭成淚人。飽受傷患困擾的謝影雪今日（2 日）再於社交網站透露詳情，坦言近月為快些跟上鄧俊文的進度，即使確診類風濕關節炎，仍多次忍痛含淚訓練。她最後抱歉沒有先照顧好先自己的身體，承諾以後會更愛錫自己。
【新聞有價 記者有格 立即訂閱：https://bit.ly/3wGQh7c】
上屆東京奧運獲殿軍的「鄧謝配」，於今屆巴黎奧運羽毛球混雙項目 8 強賽前，已表明今次是最後一次以組合參賽，可惜最終直落15：21及10：21，不敵南韓組合徐承宰及蔡侑玎。謝影雪賽後受訪時公開自己負傷備戰的辛酸故事時，與拍檔鄧俊文哭成淚人。謝影雪當日解釋自己在 1 個月前，傷患令她「連牙膏都唧唔到，頭都梳唔到」。
謝影雪今日再度公開傷患詳情，她先多謝自己，「今次好感恩第四次企上奧運舞台，由爭取奧運積分到真係完成嘅過程，已經唔識可以點形容」。她指「以前後生打波，咩傷都無嘅時候，覺得所有事都好易，條路好簡單、好易行；之後到今次奧運爭分前，我同俊文嘅狀態已經差到好似唔識打波一樣，當時幾乎無信心可以去到奧運」。她指爭分初段雖然成績一直低沉，但幸好後半年突然回復狀態，終成功打入年終賽。
不過謝影雪今年1月在印度拉傷膝頭，復原後「打針令膝頭無咁痛，但打針完之後突然出現藥物敏感，有日瞓醒兩個膝頭腫痛到瞓覺時無法轉身，連去洗手間都要扶住，令好簡單嘅日常事都無法做到。」她指年初二當日到醫院找醫生時需要坐上輪椅，到6月的一天起身，「梳頭時發現兩個手肘痛到舉唔高」，需要食住止痛藥到亞洲三站參與賽事，但「每次過幾天，就會有多一個關節出現腫痛，到最後返到香港時，手指痛到握唔到球拍，練波都練唔到，好幾次練到一半瞓喺球場度忍唔住喊，做GYM時因為伸唔直雙手，所以要調較到唔痛嘅角度去做，然後一邊做一邊喊」。
她指最後經過 8 次MRI，同埋無數次超聲波及抽血，於奧運開幕前確診類風濕關節炎。雖然食藥後痛楚減少，但之後好似壞的事會接二連三出現，1 日後膊頭第 8 次甩骹，見醫生後獲對方給予信心可出戰奧運。她數天後已經開始落球場做簡單訓練，「心入面其實仲好驚同好有陰影，以前甩骹會休息兩星期先練，練到好有信心先落場，今次只係兩日已經落場，可能係奧運令我勇氣大咗，每日都鼓起勇氣去試唔同動作，因為望住俊文自己練，我都好想快啲跟上佢嘅進度」。
謝影雪直言心中對今次巴黎奧運好矛盾，「等咗好耐最後一屆奧運，一方面我好想去享受，一方面又好想奧運快啲完，因為好期待整個人可以放鬆落嚟嘅一刻。呢三年我覺得整個人已經谷到我自己嘅極限，但呢一刻我係好開心我可以做到自己目標」。她指市民可能希望二人能嬴得獎牌，但她表示自己很想去享受這個舞台，「今次我覺得自己真係做到喇！比起上一次，我更發揮到自己嘅能力，可以打番出一個似謝影雪嘅比賽比大家睇，雖然今屆成績無上屆咁好，但對於發揮，我係今屆比較滿意」。
最後她多謝自己堅持這麼久，「我覺得呢啲事比以前既謝影雪遇到，可能已經一早放棄咗，但經過今次，我覺得我真正學識咗及做到自己嘅座右銘」。她亦多謝自己的身體18年來被用到五勞七傷，「抱歉無將你哋照顧好，我以後會更愛錫自己了」。
#巴黎奧運 #鄧俊文 #謝影雪 #鄧謝配 #羽毛球混雙項目 #印度 #超聲波 #抽血 #類風濕關節炎
