嘮動新聞

李蕙敏獻出同性螢幕初吻!逆流導演雲翔息影前新作 受演員「鬼上身」啟發論盡死亡

出版: 2022-09-19 13:30
第33屆同志影展(HKLGFF)開鑼,風格素來大膽、前衛的獨立電影導演雲翔為本屆焦點導演,兩套新作《十三門徒》與《屍房菜》首度公映,以綁縛、吃人肉等震撼畫面,激發觀眾對生死、來生的思考。雲翔指,兩套電影構思來自上一部電影《三十兒立》演員賀飛被朋友亡魂「鬼上身」的經驗,「死亡一直係我電影嘅主題,就乾脆要拍盡佢」。有份參演《十》的李蕙敏重登大銀幕,便向同性螢幕初吻挑戰,「本身我唔知有呢場,好彩同個女仔本身識,亦問咗導演呢兩個女仔嘅故事」。
雲翔早前宣布,完成手上第10部作品後將會息影,並離開駐足40多年的香港,「獨立電影條路越行越窄,我行到咁遠都覺得好攰」。在《十》及《屍》中,雲翔傾盡全力探討最喜歡的話題,「拍完真係放低咗某啲嘢......所以我放低電影,又有另一種輕身上路嘅感覺」。
記者:盧珮瑤 Phoebe
攝影:Sami Lee 
雲翔出生於中國大陸廣州市,曾任職IT行業20年。16年前,他決定追隨自己心願,成立「藝行者獨立電影公司」,製作過10部作品,包括港人熟知的《安非他命》。向來以風格獨特、大膽、尺度不設限聞名,雲翔電影在港產片中一枝獨秀。不過,今年4月,雲翔於社交網站上宣布息影,為光影人生喊「Cut」,「有時人生有啲嘢,做下做下就會覺得,不如停一停先......」,雲翔說著,有感用詞不夠精準,「我唔係停一停,我唔會再返嚟,唔會再拍」。
新作「震撼療法」刺激觀眾 李蕙敏、葛民輝、跨性別演員蔡書綺參演
在告別前,雲翔仍為香港再留下兩套珍貴寶藏。是次同志影展中首度公映其新作《十三門徒》及《屍房菜》, 以「震撼療法」帶領觀眾來回人間與死亡邊緣。
《十三門徒》講述一個自稱為蘇格拉底和柏拉圖門生的學者,因不能面對自己生命的終結,遂招募12位精壯青年,住進一個避世莊園,進行一項死亡、來生可能性的實驗,當中活動包括裸攀富士山、穿越死亡樹海、綁縛,甚至吃同伴的血肉。於戲中以教母形象飾演學者妻子的李蕙敏,笑言角色有如「伊利沙伯女王嘅教母版」,「正常嘅人去到與世隔絕嘅地方,然後我係嗰個教母、kind of queen(女王),我點樣去演繹呢?要有啲drama(戲劇化),但又唔可以太離開現實,因為我驚無說服力」。她更獻出首次同性螢幕初吻,「本身我唔知有呢場,好彩同個女仔本身識,亦問咗導演呢兩個女仔嘅故事」。
戲中李蕙敏所飾演的教母角色是一個不可生小孩的人。雲翔指,這正正與她本人經歷相同,「我擺喺Amanda(李蕙敏)身上嘅心機係比較subtle(巧妙),而家佢係領養小朋友,做緊我認為係更偉大嘅母親,佢用咁嘅心情去演繹,會演得再突出啲」。
《屍房菜》更標明是「A ghost story by SCUD」(雲翔所寫的鬼故事),一名遭性侵的士兵,自殺後附在不同人身上,周遊列國,最終流落到香港,並棲身於一間從事不為世俗容納行業、名為「Body Shop」的車房。戲中除了有葛民輝驚喜現身,更起用台灣跨性別演員蔡書綺。有份在戲中烹調人肉的譚正一(Simon),原來正職亦是廚師,「屍體嘅肉可以畀親人食,呢個對大眾嚟講係匪夷所思,但都會令我諗返煮過咁多肉,到底生命係啲乜嘢」。
裸體、性、同性戀 雲翔:「我啲電影唔係呢啲嘢」
在網路上搜尋「雲翔」,他總會與數個形容詞劃上等號:「裸露不設限」、「Gay片」、「情色」,全因大多演員們都會在戲中全裸演出,他卻拒絕這些標籤,「《Variety》報道我退休嘅消息,入面成千字,講晒我咁多年嘅風格、作品,係無『裸體』、『性』、『同性戀』呢個字,喺佢哋心目中,我嘅電影唔係呢啲嘢」。
他指,自己製作的第一部電影《無野之城》屬IIB級,只有異性戀情慾,同性最多只有親親臉頰,最終仍引來賣弄男體的批評,「因為喺男更衣室佢哋無著褲,然後我先發現,有成20年係完全無呢啲鏡頭,無演員嘅身體可以睇到,我就諗有無保守到咁?」。這激發起雲翔反叛性格,由第二部電影《永久居留》開始,演員大多時間全裸上陣,「其實裸體永遠同愛、死亡好接近,所以我覺得其他人唔做,咪我做囉,變咗係我個signature(標誌)都無可厚非」。
一次,雲翔的5歲侄兒進場看他的作品,他驚覺原來小朋友對赤裸鏡頭完全沒有抗拒,「赤子眼中根本裸體係無問題,係人大咗產生咗啲邪念......電影入面,劏肚、啲腸流晒出嚟,又得嘅,兩個人做愛又唔得嘅?你話教壞啲小朋友,咁你想佢去劏肚,定係教佢做愛?所以我覺得而家有啲標準係好荒謬」。
完成第10部作品息影 「獨立電影嘅路越行越窄」
「我唔係要離開香港咁簡單,我係要離開filmmaking(電影製作)」。雲翔於今年4月宣布,在完成手上的第10部作品,將會迎來他電影事業的最終幕,並離開他駐足40多年的香港。
「拍完《十三門徒》同《屍房菜》,我覺得真係擺低咗某啲嘢,因為我最鍾意嘅話題已經講到最盡,我相信當今世上講死亡,無人會再講得盡過我」。走在獨立電影界的前衛位置,他驀然回首要停下來,「獨立電影嘅路都越行越窄,我行到咁遠,其實都好攰」。談到香港的自由度、環境是否推因素,雲翔變得有口難言,「香港......唉......我哋都唔係好方便講」,但明言這不是一個離開的主因,「唔係話我覺得自由好受限制,例如《屍》入面戴住豬嘴做愛嗰啲鏡頭,我哋都以為過唔到,但又過到,證明香港以前係咁樣,而家都大致係咁樣,我唔會話因為我受咗好大限制而另謀他去」。
雲翔最後一部作品將會講述自己息影前的心路歷程,揚言會拋開所有政治、商業價值,只望作品可讓自己與演員留為紀念。「我起初都係有少少悲情,始終擺低一樣我做咗咁多年、我亦真心熱愛嘅事,但其實又點可以無遺憾呢?」,雲翔貫徹其反叛態度,灑脫步向新嘗試,「以前電影係霸佔咗我人生百分之百,所以我放低呢件事,又有另一種輕身上路嘅感覺」。
【香港同志影展2022】
日期:9月17日~10月1日
地點:百老匯電影中心|MOViE MOViE Cityplaza|PREMIERE ELEMENTS|PALACE ifc|高先電影院
(雲翔導演由9月18日起,將會出席每場放映後的Q&A環節)
訪問場地提供:[email protected] HK
李蕙敏髮型:Eddi [email protected]
【新聞有價 記者有格 立即訂閱:https://bit.ly/3wGQh7c

新聞有價 記者有格 $128保就業計劃
立即訂閱:https://channelchk.com/plan
撐Channel C請記者
一齊為民請命 抱打不平

😎Channel C 廣告推廣和媒體合作​!🤝
誠邀各商戶傾談廣告宣傳和合作推廣;
有意請電郵至:[email protected]

🔥「爆片爆相」返嚟喇!🔥
一經獨家採用將會獲得由網上零食店易買
送出$200元電子禮券!
報料:https://wa.me/85264691456
爆片爆相