大家食J喺7月搞咗個Logo設計比賽，上個月已經由網民投票選出設計師Edmond成為冠軍，老闆呂茂正仲親自頒咗10萬蚊支票畀佢添。你以為大家食J正籌備點樣換Logo？NoNoNo，投票未完！
話畀大家知仲有咩票要投之前，介紹返大家食J原本個Logo先，呂生話係出自佢手，「o依家用緊嘅Logo係我1999年設計嘅，我親自畫，加咗我個樣，想畀人信心，我連自己個樣都擺出嚟，真係一心一意去做！」
為咗「信心」保證，擺自己個嘜頭出嚟；為咗「民心」認證，搞個Logo設計比賽！佢話記得1999年去影相好嚴肅，雖然影咗好多幅相，但出嚟效果就畀人話大陸feel，似金槍人，為咗決心改革，建立全新形象，於是決定搞Logo設計比賽。
網民嘅踴躍程度出乎意料之外，竟然出到超過一千份設計，仲引起咗熱烈討論，「網民好多意見話改還改，唔好改到入錯門口，唔好以為係老翻。」所以從千份作品中選出100強、20強，大家食J心目中係有標準，宗旨是改好，唔係改到唔認得，「要有創意，要知道我哋叫大家食J」。
成個比賽由呂生平日嘅生意團隊負責，佢哋喺PR同搞Event方面零經驗，但團隊好清楚要秉持公平原則，第一輪內部篩選都係一人一票公平產生，呂生話自己都係得一票，「成個團隊20人，每次投票我都專登殿後，費事人哋跟我投，殿後可以令人哋發自內心咁投票，鍾意邊個咪投邊個囉。」
佢哋係喺繁忙嘅工作中，每日抽啲時間投票，斷斷續續咁，終於喺截止一個月後選出100強。為咗頒獎畀佢哋，竟然請晒100人出席頒獎禮，團隊負責人Michael話籌備過程非常艱辛，「始終對呢方面唔係咁熟識，聯絡都幾吃力，唔止打超過100個電話，仲要send email，好多甩漏，希望大家見諒。」憑住團隊嘅毅力，打咗幾百次電話，頒獎禮當日入座率都唔錯，仲請到張建聲做嘉賓，氣氛熱烈。頒獎禮同時宣佈20強，之後將作品放上網，正式畀公眾投票。
呂生認為設計唔係畀一個人認同，開放畀公眾投票係畀客人一種信心，代表好在乎佢哋嘅感受。最終得到認同、獲得4,473個LIKE嘅係設計師Edmond Tam，成功喺呂生手上贏得10萬獎金，Edmond話計難度在於原Logo太深入民心，「要認到、保留神粹就係呂生個樣，我就加咗開朗同活力嘅元素。」就係咁，一個新Logo終於誕生，原Logo陪咗呂生22年即將功成身退，問到呂生會否唔捨得，呂生就畀出驚人答案！
「無話捨唔捨得嘅，我哋想改好吖嘛，一定好小心去改，三個臭皮匠，勝過一個諸葛亮，喺各有所長嘅20強之中，集合各長處，再組合一個Logo，連埋冠軍Logo同原本Logo再公投一次！」問呂生如果最後網民投返原Logo，豈不是一切白費心機？呂生就話會尊重網民決定，比賽可以畀更多設計師展現，「通過今次比賽，知道我哋做嘅嘢得到人哋認同，錢賺唔賺到另外一回事，最重要係得到好多人嘅支持、認可，我覺得呢樣嘢真係用金錢都買唔到返嚟！」
所以，投票未完，12月16日起最終回，大家可以去大家食J fb投票！
