鄒凱光相隔12年再舉行個人Talk騷，其間講到近年人生低谷時，更多度哽咽。他受訪時解釋重提時猶如再經歷一次，故感到特別感觸。
鄒凱光（灘叔）一連3場《男性的弱點》昨晚於旺角麥花臣場館舉行。除家人外，圈中好友余迪偉、楊詩敏、陳漢娜、余德丞、張馳豪等亦現身捧場。
節目以賽馬為開場，灘叔借用「馬主夢」引入話題，表達男性在追求地位與身份認同中的掙扎，當他說到自己終於成為馬主時，笑稱：「今晚我終於可以喺朋友面前講，我係『滾水』嘅主人！」他形容自己所有「衰嘢」都是從好友身上學，又分享他對「夜總會」的獨特見解，強調這是男性學習人際交往與生活智慧的地方，他打趣道：「我高中時每周去夜總會8次，學到最多嘅就係點樣喺點歌時保持風度！」灘叔強調「title」的重要性，呼籲男性在追求身份的過程中保有真實自我。
入行初做編劇的灘叔終於有「title」，不過在片場喝水的杯上，幾乎寫錯他的名字，要親手寫上自己大名，他稱：「你一唔親手寫就『領』嘢，出現咗好多我嘅變種，好似『編劇man chan』，編劇阿『咩周』，而中文就有『編劇雛凱光』，我最鍾意嘅係『騙劇周海江』，五個字有四個字都係錯。」談到「好色一代男」，灘叔稱有智慧的男人，從來都不會逆女人意，他表示：「女人order話咩就咩，男人咪自作聰明，跟女人Order做啦！佢話要食韓燒，你唔好話熱氣！佢話要食刺身，你唔好話生冷！佢話鍾意姜B，你......唔好講嘢！女人開心，世界就會和平。」
灘叔重提人生第一個個人TALK騷《齋呵唔鬧》，指當年這個騷反應很好，大家想起灘叔便會心微笑，同時準備好繼續做棟篤笑，惟此時他的「初戀」電影又再找他，於是他心軟，又重投電影懷抱：「咁我拍電影嘅成績可以話有目共睹，然後我就開始沉；我個世界開始沉靜，冇人搵我，有一把不停怪責自己嘅聲音『明明新一頁開得好地地，點解又要死返去以前果度』、『你抵X死㗎！仲有排你受』。」完騷前，灘叔唱出新歌《阿叔今年八十歲》，全場拍手伴隨，唱至中途他搞笑謂：「仲有幾十秒就忍完，等一陣。」唱畢後有不少觀眾大叫encore。
灘叔騷後接受傳媒訪問，他表示多年未有開騷感受甚深，指演出內容較個人事，不知觀眾會有如何反應：「見佢哋好好反應，又拍晒手，應該笑嘅都笑晒，令我好感動、好滿足 。」講到於騷上感觸哽咽，他指感觸位是因為今次是講12年人生的高高低低，有如再次經歷一次故在台上一時感觸哽咽：「今日第一場，我一時情緒到忍唔到，我努力想做番好個騷，唔應該賣喊。我都唔敢望台下嘅家人，如果我望到有人喊，我就會爆（喊）出嚟。做騷唔係睇我喊，但我控制唔到情緒。（擔心另外兩場都會喊？）應該唔會啦！因為我喺排練時喊得好勁，我以為我排練嗰喊晒但頭先上台嗰心好滾動。」
提到於騷上透露曾得罪多人，包括李思捷、ViuTV高層魯庭暉及金廣誠等致歉，灘叔表示真心講「對唔住」，不會再犯相同錯誤：「我見到佢哋都有講對唔住，人哋接唔接受係另一回事，起碼我講咗先。」
#鄒凱光 #男性的弱點 #旺角麥花臣場館 #齋呵唔鬧 #阿叔今年八十歲
